Chrome estréase en dispositivos con Android 4.0

O navegador web de Google, Chrome, leva dende 2008 mellorando o xeito de moverse pola web dende o ordenador, e agora levan a experiencia a dispositivos móbiles estreando Chrome para Android en Beta, o que permite que os smartphones e tablets con Android 4.0 poidan gozar deste potente e rápido navegador web. Estamos ante un navegador que presume de velocidade, de simplicidade e de moitas outras funcións como a sincronización entre dispositivos, o que permite acceder ás fichas abertas no PC dende o móbil, obter suxestións máis intelixentes no móbil (o navegador web móbil incluirá nas súas suxestións de enderezos web os que introducimos dende o ordenador de escritorio), facilita o enviar páxinas ao terminal móbil con facilidade e tamén conta con sincronización de marcadores (para poder consultar dende calquera equipo/dispositivo as nosas páxinas web favoritas).
Á aplicación non lle faltan prestacións como a navegación privada en modo incógnito, aínda que coma limitación podemos comentar que carece de soporte de Adobe Flash Player. Xa está dispoñible para a súa descarga dende o Android Market. Falta por ver agora se os fabricantes de móbiles deixarán o navegador web que vén normalmente instalado de serie nos seus dispositivos ou optarán polo novo navegador como opción preferente.