China bloquea totalmente o acceso a Gmail

Google rexistrou unha drástica caída do tráfico de Gmail en China

Tras meses experimentando problemas de conectividade no territorio chinés, parece que finalmente o servizo de correo electrónico de Google, Gmail, está totalmente bloqueado dentro de China dende o pasado venres, cando a grande devasa electrónica chinesa tería incluído un importante número de enderezos web de Gmail, facendo que o servizo quedase practicamente inaccesible como unha medida máis para erradicar a presenza da compañía norteamericana dentro de China.
Se atendemos ao informe de transparencia de Google, podemos ver como o tráfico en tempo real de Gmail en China caeu drasticamente nos últimos días, e aínda que Gmail xa levaba varios meses bloqueado vía web, agora tampouco está dispoñible a través de IMAP, SMTP e POP3, de xeito que os que empregaban o servizo a través de aplicacións tampouco poderán acceder ao mesmo, completando o bloqueo.
Este tipo de controis excesivos da Internet provoca grandes problemas para empresas multi-nacionais, que ven así moitos atrancos para operar dende China, xa que servizos como Gmail son empregados masivamente como solucións de correo corporativo, de xeito que a única solución viable para poder traballar dende China con certa normalidade é empregando plataformas VPN que permitan un acceso á Rede fóra do control gobernamental.