Chega ás redes o certame de podcast dos Premios Martín Códax da Música
luns, 27 de abril do 2020
O
dixital ábrese paso e dá impulso xa todas as actividades culturais
e creativas que se celebran ou preparan na nosa terra. Por
exemplo a segunda edición do Proxecto Didáctico Premios Martín
Códax da Musica presentada esta fin de semana, unha contribución
radiofónica para fomentar a creatividade nos centros escolares a
través do traballo cos proxectos inscritos nesta convocatoria. O
certame é un novo exemplo de teimosa redeira, coa
organización facendo esforzos para sortear as dificultades da
situación pandémica actual debido á importancia clave da súa
cerna: os novos talentos da rapazada “unha aposta clara polo
futuro”. O obxectivo reforzado desta segunda edición é que as
nenas e nenos “desfruten descubrindo e escoitando música galega”.
O
proxecto didáctico anima ao alumnado a elaborar un pequeno programa
de radio, en formato podcast (ficheiro MP3), para divulgar e dar a
coñecer as diferentes bandas e estilos musicais que se presentan aos
mencionados premios.
Neste
ano, ademais, a proposta do proxecto xirará ao redor daquelas bandas
con presenza de mulleres. Baixo o suposto de que as bandas galegas
de/con integrantes femininas foron secuestradas, o alumnado terá que
indagar entre os proxectos inscritos nesta edición dos Premios
Martín Códax da Música para atopalas. Unha vez feita a descuberta,
será cando realicen a gravación do programa falando do grupo que
máis lles gustou.
Adaptación
do proceso á situación actual
A
organización cóntanos que se ben o proxecto didáctico
foi enviado a tódolos centros educativos e profesorado, cunha
proposta inicial para o alumnado de 5º a 6º de Educación Primaria
e 2º da ESO, “a excepcionalidade da situación deu pé e a que se
flexibilizara o seu uso para outros cursos, tomando en consideración
o que o profesorado estime oportuno”.
O
prazo límite para facer chegar os programas en formato MP3 ou as
ligazóns aos podcasts é o 29 de maio.
Dende
a organización quérese facilitar “ao máximo” que tódalas
alumnas e alumnos poidan ser partícipes desta actividade, “por iso
admitirase gravacións feitas cun teléfono móbil ou calquera outro
dispositivo que poidan ter as rapazas e rapaces nas súas casas”.
Como
se fixo na edición anterior, todos os podcast recibidos serán
subidos á radio online dos premios e daráselles visibilidade
a través das redes sociais de MAV e dos propios galardóns.
Entre
todos os podcast publicados escollerase un e ofreceráselle aos/ás
participantes a posibilidade de acudir á gala dos Premios Martín
Códax da Música.