Chega a versión española do certame de monólogos científicos Famelab
martes, 4 de decembro do 2012
O certame
internacional de monólogos científicos, Famelab,
chega a España. Esta edición estatal é unha iniciativa conxunta de
FECYT (Fundación Española para a Ciencia e a Tecnoloxía) e do
British Council, compartindo coa versión internacional a arela de
motivar a investigadores e a desenvolvedores de tecnoloxías a
achegar os proxectos e traballos de seu á sociedade “dun
xeito ameno e doado de entender”. O
prazo para a presentación de candidaturas iniciarase este 4 de
decembro de 2012 e remata o 31 de xaneiro de 2013.
FameLab naceu en
2005 grazas a unha idea orixinal do Festival
de Cheltenham, cuxo principal obxectivo é fomentar a divulgación
da ciencia identificando, formando e dando a coñecer novos talentos
entre os que traballan en ciencia a través dun formato innovador, o
monólogo científico.
Desde 2007, grazas á asociación co
British Council, FameLab celébrase en máis de 20 países de Europa,
Asia, África e Estados Unidos. A nivel mundial son xa máis de 3.800
persoas as que participaron nalgunha das súas edicións.
FameLab proponse apoiar e animar ás
persoas que traballan en ciencia a utilizar as súas habilidades
comunicativas para facer chegar o contido do seu traballo á
sociedade no seu conxunto, non só aos seus colegas e compañeiros.
Os participantes
deberán gravar nun vídeo un monólogo en castelán que teña como
base un tema científico e/ou tecnolóxico, cunha duración máxima
de 3 minutos e terán que presentalo na páxina do certame,
famelab.es.
O tres primeiros participantes
clasificados na terceira fase serán galardoados cos seguintes
premios respectivamente:
1º Premio: iPhone 5 16GB (libre)
2º Premio: iPad 3 32GB
3º Premio: iPod Touch 32GB
Ademais, o primeiro clasificado do
certame Famelab España competirá no certame de Famelab
Internacional xunto cos gañadores dos certames nacionais organizados
noutros países.