Chega a Rede WiMAX aos polígonos industriais de Arzúa e Meaño

Proseguindo co seu labor de levar Internet de alta velocidade a tódolos polígonos industriais de Galicia, a Xunta fará posible que, en breve, os empresarios e empresarias dos polígonos de Arzúa e Meaño poidan dispoñer de acceso á Rede para a súa actividade diaria, algo que na sociedade actual se converteu xa nunha ferramenta imprescindible para competir no mercado en igualdade de condicións.
Xa que logo, estas dúas áreas industriais disporán de Rede WiMAX para acceder á banda larga a partir de mañá martes, 2 de marzo, posto que ámbolos dous se incorporan ao proxecto WiMAX en polígonos industriais e parques empresariais que está a desenvolver a Secretaría Xeral de Modernización e Innovación Tecnolóxica no noso país.
A intención do executivo é paliar as carencias no acceso a Internet de banda larga nestes puntos xa que, segundo afirman, “as deficiencias no acceso a unha Rede de calidade nestas zonas provocan unha diminución considerable na capacidade das empresas alí radicadas para competir no mercado actual”.
A incorporación a esta iniciativa do Parque Empresarial de Arzúa e do Polígono Industrial de A Pedreira, no Concello de Meaño súmase a outros 25 parques da Comunidade que xa tiñan operativa a citada rede e, segundo informan dende a Xunta, “outros sete parques empresariais e polígonos industriais incoroporaranse ao proxecto nos vindeiros meses”.
O obxectivo deste proxecto é solucionar o acceso a Internet das diferentes empresas situadas nestes emprazamentos mediante unha actuación que conta cun orzamento de 4,8 millóns de euros, e que, sufragada en parte por fondos FEDER, se iniciou xa en febreiro de 2008. Neste sentido, a implantación da WiMAX –rede que permite a transmisión de datos empregando ondas radioeléctricas– permitirá aos polígonos arranxar unha grave carencia ao tempo que dotará as diferentes zonas dunha gran capacidade de atracción para acercar novas empresas.