Chega a Ferrol a exposición Galiciadixital
venres, 26 de novembro do 2010
O delegado territorial da Xunta de Galicia na Coruña, Diego Calvo, desprazouse
hoxe ata Ferrol para inaugurar a exposición itinerante Galiciadixital, que
botou áncoras nesta cidade para amosarlle a toda a cidadanía os contidos máis
innovadores en materia de interactividade chegados da man da Secretaría Xeral
de Medios.
Durante o acto de inauguración, o
delegado sinalou que todos os contidos que se exhiben na mostra están feitos
por empresas e universidades galegas e convidou aos visitantes a facer unha viaxe
virtual e interactiva pola nosa comunidade, a través das distintas ferramentas
que ofrece esta peculiar mostra.
Calvo estivo acompañado polo presidente da Autoridade Portuaria
de Ferrol-San Cibrao, Ángel M. del Real, quen agradeceu a colaboración coa
Secretraría Xeral de Medios e lembrou que esta exposición se enmarca dentro das
actividades organizadas con motivo do Centenario do Porto. Aproveitou tamén
para animar aos veciños de Ferrol e comarca a
visitala.
Pola súa banda, a directora da TVG, Rosa Vilas, manifestou o orgullo da
entidade por celebrar os seus primeiros 25 anos e amosouse “enormemente satisfeita de facelo no
escaparate privilexiado da exposición Galiciadixital da Secretaría Xeral de
Medios”.
Galiciadixital, ao igual que en anteriores ocasións nas que se achegou a
caseque tódolos recunchos da nosa xeografía, poderá visitarse de balde na sala
de exposicións do Porto de Ferrol en horario de 10:00 a 14:00 e de 16:00 a 20:00
horas ata o vindeiro día 1 de decembro.
Entre as actividades ofertadas, inclúe os seus contidos habituais como o xogo Aerodeslizadores
por Compostela, o canciño robótico Axóuxere
ou o Tiraboleiro virtual, que lle permitiará aos visitantes converterse
en tiraboleiros do Botafumeiro da Catedral de Santiago por un día.
Asemade, as persoas
que se acheguen ata as instalacións temporais de Galiciadixital en Ferrol,
poderán somerxerse nun mundo virtual a través da proxección da película Meta
do Camiño, unha curtametraxe en 4-D que lle engade ás tres dimensións efectos
especiais de vento, aroma e fume. Nela, un peregrino acompaña e ilustra ao
visitante nun breve percorrido polos lugares máis relevantes da catedral de
Santiago de Compostela. Algúns destes sitios non son accesibles doadamente para
o visitante convencional, como o altar maior, o órgano, o sepulcro, os tellados
ou o impactante botafumeiro que os vistantes poderán tocar (sempre
virtualmente) coas súas propias mans.