Celébrase o primeiro pleno do Observatorio da Sociedade da Información e a Modernización de Galicia

A secretaria xeral de Modernización e Innovación Tecnolóxica, Mar Pereira, presidiu hoxe o primeiro pleno do Observatorio da Sociedade da Información e a Modernización de Galicia (OSIMGA), un órgano de nova creación, que fusiona os dous observatorios existentes ata o de agora (OGSI e OCEG), e que se nace como o instrumento único para desenvolver estudos e análises de datos sobre a situación da sociedade da información en Galicia, a modernización administrativa e administración electrónica. Nesta primeira xuntanza presentouse o plan de actividades 2010 e a nova páxina web. Ademais, déronse a coñecer os últimos datos sobre os indicadores de acceso e o uso das novas tecnoloxías por parte da cidadanía, as empresas, o sector TIC e o panorama actual das telecomunicacións na Comunidade.
A información recollida no informe Estado da Sociedade da Información en Galicia 2009 enmárcase dentro das actividades cualificadas como observacións de carácter xeral nas que traballará o Observatorio e que permitirá coñecer o nivel de desenvolvemento, a tendencia e posibles problemáticas que poden afectar ao desenvolvemento das novas tecnoloxías na sociedade e nas empresas así como na aplicación do modelo de eGoberno nas administracións públicas.

Mar Pereira presidiu o pleno do OSIMGA

Outra das tarefas do OSIMGA é a de realizar observacións planificadas de carácter temático, é dicir, promover e xestionar a elaboración e difusión de publicacións técnicas, impresas ou electrónicas, específicas e monográficas ou de publicación periódica. Ademais, o OSIMGA facilitará datos a outros organismos e entidades con competencias específicas na materia para o que promoverá a colaboración e cooperación con outros observatorios estatais, autonómicos e europeos para contrastar indicadores, compartir boas prácticas e establecer sinerxías de actuación.
O pleno do Osimga, presidido pola secretaria xeral de Modernización e Innovación Tecnolóxica da Xunta de Galicia, Mar Pereira, está integrado por outros membros desde departamento autonómico, representantes das Consellerías de Economía e Industria, Presidencia, Administracións Públicas e Xustiza, Facenda e do Instituto Galego de Estatística xunto cun titular de competencias no ámbito da Sociedade da Información pertencente á Administración do Estado, un representante das universidades públicas galegas e unha persoa designada pola Federación Galega de Municipios e Provincias. Ademais, cóntase coa participación de dúas personalidades de recoñecido prestixio en materia da sociedade da información e de modernización administrativa, o divulgador e profesor de Sistemas da Información na IE Bussines School, Enrique Dans e o ex conselleiro de Presidencia da Xunta, Dositeo Rodríguez, respectivamente.

Informe do Estado da Sociedade da Información en Galicia 2009 presentado hoxe polo OSIMGA