Carrefour contribúe con novas tecnoloxías á participación social dos nenos con cegueira
xoves, 9 de decembro do 2010
A Fundación
Solidariedade Carrefour e máis a Fundación ONCE veñen de unir
forzas para favorecer a participación social de nenas e nenos con
diversidade funcional. A iniciativa, que se chama Comunícate cos nenos xordocegos, diríxese en boa medida a tirar partido
das novas tecnoloxías para facilitar este proceso de inclusión, adaptando as
que xa existen ou traballando pola posta en marcha doutras novas. Para comezar,
a dita Fundación recibiu o apoio de Big Picture e Sony Pictures para o
lanzamento (a partir do 1 de xaneiro) de dez DVD infantís dirixidos a estes
colectivos. Trátase de produtos cun prezo de saída de 5 euros, dos que 1,5 irán
destinados a fines solidarios con estes cativos. Os DVD, que estarán á venda en
tódolos emprazamentos de Carrefour, inclúen aventuras de Caillou, Pocoyó e
outros personaxes de animación.
Amais disto, a iniciativa incorpora a adaptación ás
demandas das nenas e nenos con cegueira de diversas tecnoloxías, co fin de “contribuír á redución do illamento
comunicativo e social no que se atopan ou se poden atopar”. Entre estas
axudas técnicas incluiríanse teléfonos que falan e vibran, computadores con
voz, ampliación de imaxe e liñas braille, espertadores con sistemas de alarma
sensorial, ordenadores portátiles con software lector de pantalla e outros con
software de ampliación de pantallas, así como sistemas de fagan máis doado o
acceso ás redes.