Carme Artigas reiteira o apoio do Goberno de España ao proxecto da Cidade das TIC
xoves, 4 de novembro do 2021
A
secretaria de Estado de Dixitalización e Intelixencia Artificial,
Carme Artigas, participou este 4 de novembro na
primeira xornada do curso da UDC e a UIMP sobre as posibilidades
tecnolóxicas e de emprendemento que abre o proxecto da Cidade das
TIC, a antiga Fábrica de Armas da Coruña. Na súa intervención
felicitou pola dita iniciativa tecnolóxica-emprendedora ao reitor da
Universidade da Coruña, Julio Abalde, e referendou a intención do
Goberno estatal de seguir apoiando o proxecto. Tamén mostrou o seu
convencemento sobre o potencial do mesmo para impulsar a Galicia no
ámbito internacional.
Artigas
impartiu a lección inaugural do curso A Cidade das TIC:
construíndo un futuro dixital, que organizan o reitor, Julio
Abalde, e a catedrática de Computación e Intelixencia Artificial
(IA) da UDC, Amparo Alonso, da que a secretaria de Estado asegurou
que “Galicia está moi ben representada, con Amparo Alonso e a UDC,
na estratexia de IA de España”.
Artigas
debullou o proceso de transformación dixital no que está mergullada
España, un proceso que “será clave na reconstrución económica e
social” e avanzou que a IA vai traer “moitas oportunidades”
para a economía española e mundial. De feito, dixo, calcúlase que
poderá xerar en Europa 60 millóns de postos de traballo para 2025.
Alertou tamén das dificultades que ten España co 40% da súa
poboación con carencia de habilidades dixitais básicas e resaltou o
labor da universidade no eido da formación: “É imprescindíbel
elevar o coñecemento científico, os postos de traballo do futuro
van ser de altísima cualificación”, avanzou.
O
presidente do Consello Económico e Social de España, Antón Costas,
quen interveu a continuación, recolleu o dato da analfabetización
dixital existente en España para alertar “das graves consecuencias
sociais e económicas que terá para o país non avanzar nas
habilidades dixitais da poboación”. O catedrático de Economía da
Universidade de Barcelona propuxo a creación dun “contrato social
dixital” que teña como base, en primeiro lugar, a alfabetización
dixital no cento por cento da poboación e, en segundo lugar, na
escolarización gratuíta para os nenos e nenas de cero a tres anos,
fundamental para construír unha economía dinámica e sustentábel
nun mundo dixital.
Costas
explicou que o proceso de dixitalización debería aprender do
proceso de industrialización para non caer nos mesmos erros. De
feito, considera “fundamental” ter en conta non só o punto de
partida e o de chegada senón o proceso de transición e traballar
nesa etapa para evitar desigualdades e para que o proceso teña
éxito.
O
curso foi inaugurado esta mañá na Fundación Luis Seoane polo
reitor, Julio Abalde, a directora da UIMP Galicia, Obdulia Taboadela,
a subdelegada do Goberno, María Rivas, o delegado da Xunta, Gonzalo
Trenor, e o concelleiro de Educación, Jesús Celemín.
O
reitor lembrou os inicios do proxecto nunha conversa de traballo co
presidente do Clúster TIC Galicia, Antonio Rodríguez del Corral,
presente tamén no curso, na que se tratou o tema da potenciación da
dixitalización na sociedade. A Universidade da Coruña, concluíu
Abalde, ademais de dar formación “ten que xerar proxectos
tractores para o desenvolvemento da sociedade”.
Tanto
a subdelegada do Goberno, como o delegado da Xunta e o concelleiro
manifestaron a importancia e envergadura do proxecto da Cidade das
TIC que ten solicitados 55 millóns de euros para o seu
desenvolvemento aos fondos Next Generation a través das propostas
que a Xunta de Galicia realizou ao Goberno estatal.
O
curso continúa na tarde deste 4 de novembro e ao longo da xornada
seguinte.
Programa
Xoves,
4 de novembro
10:00h.
Inauguración
10:30h.
Intelixencia Artificial, clave na recuperación económica.
Carme Artigas Brugal, secretaria de Estado de Digitalización e
Inteligencia Artificial
12:00h.
Mesa redonda: As empresas tecnolóxicas e a súa aposta pola
Cidade das TIC. Interveñen: Indra, Everis, IBM Research e
Antonio Rodríguez del Corral presidente do Clúster TIC
16:00h.
IA e sustentabilidade: impacto social e económico. Amparo Alonso
Betanzos
17:00h.
Mesa redonda: Retos e oportunidades da IA no desenvolvemento de
empresas innovadoras. Interveñen: ABANCA Innova, Estrella
Galicia, CETAG, GAIN/IGAPE, Fondos Capital-Riesgos CDTI
Venres,
5 de novembro
10:00h.
Estratexia dixital e de IA de Galicia 2030. Mar Pereira,
directora de AMTEGA.
12:30h.
Mesa redonda: Dixitalización, IA e Big Data: motor económico e
innovación empresarial. Interveñen: Alejandro Casteleiro, CEO
Artabro Tech; Antonio Rodríguez del Corral, CEO de Cinfo; Fernando
Vázquez, Director de Imatia; Guillermo Lopez Taboada, CEO Torusware
16:00h.
Economía e sector TIC en España e Galicia. Fernando González
Laxe, ex-presidente da Xunta de Galicia e Catedrático de Economía
Aplicada na Facultade de Economía e Empresa da Universidade da
Coruña
18:00h.
Conferencia de clausura: Retos da nova sociedade nun mundo
dixital. Antón Costas, catedrático de Economía da Universidad
de Barcelona e presidente do Consejo Económico y Social.
Este
evento forma parte da oferta de cursos breves da Universidad
Internacional Menéndez Pelayo Galicia, coa colaboración do Concello
da Coruña. O curso é presencial, para asistir é preciso
inscribirse en galiciasa@uimp.es.