Carballo quere impulsar a normalización co seu premio ao proxecto de webserie en galego
luns, 28 de marzo do 2016
O Concello
de Carballo, a través do seu Servizo de Normalización Lingüística,
quere que o galego estea presente en tódolos nosos ámbitos
comunicativos e creativos. Por esta razón, está
a impulsar actividades concretas de normalización en eidos onde non
sempre a lingua está tan presente como sería de desexar. De aí
xorden, en relación a estes días, a edición número 12 do Premio
a artigos xornalísticos normalizadores e a terceira do
Premio a proxecto de webserie en galego. Este último
galardón, como
xa adiantamos dende Código Cero os días pasados, convócase ao
abeiro do Festival de
Contidos Dixitais Carballo Interplay, que se vai desenvolver os
días 5, 6 e 7 de maio.
No que
atinxe ao galardón que recoñece artigos xornalísticos que poñan
en valor o galego, inclúe unha contía de 1.000 euros para a achega
gañadora, que será difundido en Praza Pública, Diario de
Bergantiños, El Correo Gallego, Galicia Confidencial, La Opinión de
A Coruña, La Voz de Galicia, Praza Pública, Que pasa na Costa,
Sermos Galiza e Tempos Novos.
Polo que
respecta ao premio á webserie en galego, ten unha dotación
económica de 1.500 euros. Diríxese, en palabras do Concello, a
“fomentar a creación dixital innovadora, en lingua galega e para o
mundo”. O novo galardón, que se resolverá cun pitching
en directo durante o festival e cuxa dotación deberá destinarse á
produción dos primeiros capítulos da webserie premiada,
súmase aos xa existentes no devandito Festival CarballoInterplay:
mellor webserie de imaxe real, mellor webserie de
animación, mellor webserie internacional e mellor webserie
en versión orixinal en galego con 800 euros e trofeo, para cada
categoría, e a escolla do público, con 400 euros e trofeo.
Volvendo ao
galardón “normalizador”, lembrar que as achegas poden presentarse
até o 11 de abril. Entre todos os proxectos recibidos, o comité de
selección do festival escollerá un máximo de cinco proxectos e os
proxectos finalistas terán que defender o seu proxecto facendo como
dixemos un pitching perante os membros do xurado específico.
Isto materializarase nun acto aberto ao público a desenvolver o
xoves 5 de maio no Auditorio da Casa de Cultura do Concello de
Carballo.