Cambio traballos de pintura por curso de polaco: medran na Rede (e na vida real) os recursos de troco
mércores, 20 de decembro do 2006
Hoxe toca falar de troco. O troco, para
comezar, vai en contra da lóxica actual do consumo. En contra das luces de
Nadal e do consumo de luz que paga toda a sociedade (crea ou non no espírito
consumista do Nadal), en contra dun Papá Noël dando voltas por un centro
comercial, en contra do Ikea, en contra do Carrefour, de El Corte Inglés e dos
programas de televisión pagados por publicidade. Ou, se cadra, non vai en
contra de nada diso, senón que vai ó seu aire. Un aire de balde. Defende o
valor do intercambio de obxectos e servizos e xa está.
O caso é que todos tendemos a ser semellantes
abondo se practicamos o troco, como ben sinala o colectivo galego Verdegaia
(que vén de organizar por certo un mercadiño do troco na praza de Cervantes de
Santiago) na súa web www.verdegaia.org ou
mesmo a psicóloga Heidemarie Schwermer, quen renunciou
ó emprego de cartos hai uns sete anos e leva dende aquela amosándolle ó mundo
enteiro o feliz que é dende que se quitou de enriba a don diñeiro.
- Intercambio de obxectos nas rúas de Berlín
Mais volvamos a Verdegaia, que estivo hai uns días na
antiga praza compostelá onde se levaba a cabo o comercio do pan defendendo a
idea de pórnos a todos á mesma altura polo que somos e non polo temos na conta
bancaria: “Falamos dun sistema de mercado
no que se ten en conta o valor das cousas, non o seu prezo en moeda, e que
diminúe as diferenzas sociais á hora de consumir”, comenta este colectivo
no seu espazo web, onde tamén se reivindica o emprego da bicicleta no canto do
uso compulsivo dos automóbiles, ou a defensa de árbores autóctonas no canto da
plantación de eucaliptos. Verdegaia convidou ós veciños de Compostela a traer
dos seus fogares todo aquilo que ficase esquecido nos andeis e nos armarios e
puidera ser intercambiado por outros obxectos: libros, discos, roupa en bo
estado ou ferramentas. O abano era ben amplo e a experiencia, para ser unha das
primeiras tomas de contacto, foi moi positiva. O colectivo Verdegaia, de seguir
con esta teima do intercambio, é posible que comece a sentar os alicerces en
cidades, vilas e barrios de Galiza para a aparición de agrupacións de veciños
semellantes á
rede LETS de Barcelona ou El Trueque de Madrid, que levan anos traballando
baixo o seguinte lema: cada un ofrece o que pode e o que quere facer. En base a
isto, a este espírito de axuda mutua, pódese intercambiar un curso en deseño de
páxinas web por outro de francés, ou unha sesión de pintura de paredes por
outra de zurcido de calcetíns.
Máis ou menos polas datas en que a páxina web
da asociación Verdegaia informaba destes acontecementos, soubemos da existencia
dunhas tendas en Alemaña que, malia non reivindicar a experiencia do troco en
si mesma, si que se poden situar nesta liña ideolóxica a contrapelo da
industria e o seu brazo dereito, a publicidade intensiva, que conseguen que
empreguemos os cartos que recibimos polo noso traballo en obxectos que só
consideramos importantes por unhas horas. Falamos das tendas Umsonst Laden (que
podemos visitar virtualmente en www.unsonstladen.info)
e que, de tan raras que son nun mundo en que todo (até nós) leva prezo e código
de barras, semellan case unha gran broma. Mais todo apunta a que estes
establecementos -onde todo é de balde- son reais e que están feitos para durar
no tempo. De feito, algunha destas tendas xa leva aberta dende principios da
década dos noventa, malia que foi a principios deste século no que vivimos
cando afianzaron as súas raizames e se espallaron en Alemaña. Funcionan de
xeito simple, ofrecendo todo tipo de obxectos (roupa, libros, música, xoguetes)
gratis. Só se lles pide ós futuros portadores destes materiais unha condición:
que lles dean uso. Polo demais, poderán levar de alí o que lles pete. E,
ademais, os clientes (pero debemos seguir falando de “clientes”?) terán a
seguridade de moverse por un establecemento ben singular onde sería
practicamente imposible que se cometese un atraco. Con que finalidade? A pregunta
que nos podemos facer agora é a seguinte: de onde sacan estas tendas todo o
material para distribuílo entre os veciños? A resposta está nas doazóns, no
propio intercambio e, tamén, no aproveitamento de todo aquilo que a xente que
máis ten xa non precisa e, en base a esta crenza persoal, imaxinan que non
precisa ninguén. Baséanse polo tanto en darlle un xiro a esa práctica
xeralizada de tiralo todo ó lixo. É dicir: nas Umsonst Laden, unha boa parte
dos obxectos van dos colectores ós andeis.
Exemplos
na Internet
Non deixa de ser curioso como a práctica do
troco, que debe ser tan vella como o intre mesmo en que se cruzaron por vez
primeira e nun mesmo vieiro dous seres humanos (seres humanos con cadanseu
obxecto intercambiable e con mamuts peludos ó fondo), estea atopando agora unha
importante repercusión nun medio tan afastado no tempo e no espazo destes dous
personaxes cos que abrimos este parágrafo: Internet. Mais non hai dúbida de que
a Rede ten todo o que hai que ter para favorecer o troco, polo que lle acae tan
ben coma uns calcetíns grosos en inverno: inmediatez, máis posibilidades de
comunicación, liberdade, meirandes opcións de atopar destinatarios de obxectos,
etc.
Temos entre mans algúns exemplos. Un dos máis
novos é QuieroCambiarlo.com, unha
web en castelán que, se ben non ten moito fondo polo de agora, promete algúns
logros importantes a nivel virtual, e real. Neste servizo é posible
intercambiar todo tipo de obxectos e servizos: casa e fogar (agricultura,
decoración, bricolaxe), coleccionismo (obras de arte, libros, selos, discos),
ensinanza (material escolar, cursos, formación), motor (accesorios, pezas,
vehículos) ou xogos e xoguetes (coches en miniatura, xogos de mesa, bonecas,
peluches). A páxina inclúe buscador, ferramentas de xestión e consellos para
axudarnos a non ser vítimas de fraudes por parte doutros usuarios.
Pero sigamos cos exemplos. En Código temos
certa predilección por Sindinero.org,
web da que xa falamos no anterior número en papel. O seu obxectivo é este:
rexistrar datos sobre actividades culturais ou formativas de baixo prezo ou de
balde que hai en Internet e aglutinalo todo nun único taboleiro, que é o que
constitúe precisamente Sindinero. En realidade, o nome da web xa fala por si
soa: falamos dunha ferramenta que nos axuda a vivir ó noso aire e, sobre todo a
respiralo sen ter que preocuparnos de que alguén nolo cobre. Ou sexa: que
achega información de valor sobre novos xeitos de gozar a cultura que non
hipotequen as nosas economías. Nesta web hai un importante apartado para o
troco.
Asemade, Internet conta coa presenza de www.acambiode.com,
que segue un pouco a liña das experiencias devanditas pero achegando un punto
de vista máis empresarial ou, por así dicilo, máis orientado a internautas que
procuran medios de vida. En realidade, é un directorio de empresas e
profesionais autónomos na procura de oportunidades para o troco comercial. Baséase
no factor “comodidade”, xa que os seus responsables sinalan que é unha das
principais características do sistema do intercambio de servizos e tarefas.
Dito doutra maneira: o intercambio céibanos da obriga de posuír algo que se
cadra non temos, o diñeiro. Na web favorécese o acordo de compra-venda entre
dúas empresas ou dous profesionais, “coas
mesmas características ca na compra-venda tradicional”. As vantaxes
semellan evidentes, sobre todo no que se refire ó aforro de cartos: “Poderás obter material de oficina, viaxes,
agasallos de empresa, publicidade ou mesmo servizos de asesoría sen que iso
afecte á túa liquidez”, sinala a web. Ademais, é posible acadar novos
clientes ou provedores sen que iso traia consecuencias ás relacións actuais coa
restante carteira de clientes ou provedores.