Cada mes detéctanse 113.500 grupos novos de sitios de phishing
martes, 22 de xullo do 2014
Cada mes, como mínimo
hai uns 100.000 grupos novos de phishing. Esta cifra é o
resultado dun cómputo específico levado a cabo por Kaspersky
Lab, que quixo saber o número de grupos de tentativas dixitais
de fraude e suplantación que se engaden cada catro semanas á súa
base de datos. O estudo guindou a cifra de 96.609 grupos para 2013,
aínda que no primeiro trimestre de 2014 a porcentaxe aumentou “de
forma considerábel”, sinala a compañía de seguridade TI. No que
vai de ano, a media é de 113.500 novos cada mes, o que supón un
incremento do 17,5%, engade.
A raíz destas e outras
cifras, a empresa conclúe que non só “se está a notar un maior
número de ligazóns falsas, senón que, ademais, son eliminadas máis
rapidamente, de forma deliberada”. Estes períodos de vida tan
breves “dificultan moito a tarefa dos programas antiphishing”,
explican os responsábeis da compañía, que tamén lembran que o
phishing é un engano moi doado de levar a cabo entre os
usuarios de Internet, engano que case sempre se dirixe a facerse cos
seus datos persoais e financeiros.
Este tipo de prácticas
inclúe a creación de novas ligazóns fraudulentas cada minuto,
actuando moitos destes sitios de suplantación en liña en pequenos
anacos de tempo. O obxectivo desta estratexia é facer imposíbel que
a páxina acade mala reputación (pola súa brevidade no tempo de
vida) e ter un lugar nas bases de datos antiphishing
establecidas polas empresas de seguridade. Dito doutro xeito, trátase
de ir por diante das empresas de seguridade, cousa que case sempre se
consegue. Segundo fai saber Kaspersky, este xeito de actuar é
radicalmente diferente ao tradicional, e cambia as regras do xogo
para o desenvolvemento de produtos antiphishing. “Agora”,
sinala, “compre vixiar moi polo miúdo a relevancia dos grupos de
sitios phishing almacenados na base de datos”.