Caballero e Silva salientan as oportunidades para as empresas que abre SmartPEME
luns, 7 de maio do 2018
Ofrecer formación TIC conectada co presente e co
futuro inmediato, de valor. E facelo, ademais, de maneira universal
e, ao mesmo tempo, local. Este é un dos grandes obxectivos do
programa SmartPEME da Deputación de Pontevedra, a rede de puntos de
coñecemento tecnolóxico-dixital avanzado con sedes en Cambados,
Barro, Lalín, A Estrada, Vigo, Ponteareas, O Porriño e a propia
Pontevedra. Estes
cometidos foron dados a coñecer a semana pasada pola presidenta da
Deputación, Carmela Silva, e máis polo alcalde de Vigo, Abel
Caballero, nun almorzo-networking de SmartPEME celebrado no
Auditorio do Areal de Vigo e protagonizado por Manel Loureiro.
Na cita, Loureiro amosou (entre outras cousas)
como crear unha marca persoal no contexto dixital. A presidenta da
Deputación, pola súa banda, anunciou que o 23 de maio a rúa do
Príncipe acollerá os proxectos impulsados polos rapaces e rapazas
que participan en DepoEmprende na Escola.
O alcalde de
Vigo, Abel Caballero, asegurou que “SmartPEME é unha grande
oportunidade para conseguir que as novas dinámicas sociais e
económicas se mesturen coas novas tecnoloxías, un mundo que apenas
leva 15 anos en marcha, e vainos permitir entender como se ten que
producir o modelo 4.0, no que xa estamos, no complexo mundo da
empresa e do social”.
Caballero afirmou que “o século XXI estanos
abrindo moitas oportunidades a toda a cidadanía, e especialmente
nunha cidade como Vigo que vive na economía e debe estar preparada
sempre para implantar as novidades e entender por onde van os
procesos económicos, sociais, administrativos e territoriais,
abríndonos a todo o que ofrece a modernidade”.
Novidades deste ano ao abeiro de SmartPEME
A Deputación de Pontevedra lembra que o proxecto
SmartPEME comezou en 2018 afrontando unha nova etapa na súa andaina,
un novo treito no que o programa verá aumentados os servizos a
fornecer, abrindo tres novas grandes liñas como son o Centro
Provincial de Economía Dixital (CPED), que estará situado no
viveiro de empresas de Barro, SmartPEME Impulsa e TurisTIC, que se
irán facendo dispoñíbeis para as persoas autónomas e empresas a
partir dos vindeiros meses.
A través do Centro Provincial de Economía
Dixital vaise mostrar ás empresas as ferramentas, aplicacións e
solucións innovadoras máis relevantes que a economía dixital
ofrece. Para iso, o CPED apoiarase nas instalacións do FabLab que a
Deputación de Pontevedra ten instalado no viveiro de Barro.
Doutra banda, SmartPEME Impulsa abrirá novas vías
de asesoramento en materia de innovación, competitividade e
internacionalización, “unindo deste xeito os obxectivos das
empresas coas máis novas tecnoloxías, procesos e servizos”,
explica a Deputación, engadindo que TurisTIC, como indica o seu
nome, presentarase como “un punto de apoio tecnolóxico para o o
sector turístico”. Trátase dun servizo enmarcado no Plan
Estratéxico de Turismo Rías Baixas e que pretende potenciar o
sector a través de axudas ás empresas para adaptarse á contorna
dixital.
Datos
sobre o Proxecto SmartPEME
SmartPEME
é un novo modelo de servizo orientado á mellora competitiva das
PEME e á procura dunha melloría nas vendas e na eficacia e
eficiencia das tarefas, que abre novos eidos de actuación e acada
novos grupos de interese coma os emprendedores, as asociacións
empresariais e os axentes de dinamización en concellos.
O
devandito obxectivo, nas oficinas do Porriño, Cambados, Pontevedra,
Lalín, Ponteareas, Vigo, A
Estrada e (agora tamén) Barro,
abrangue seguintes actividades: itinerarios de obradoiros temáticos
con diversos niveis de dificultade adaptados ás necesidades das
empresas, eventos de networking
trimestrais coa participación de profesionais de prestixio,
colaboración con asociacións e promoción de alianzas
institucionais, especialización sectorial dos asesores en función
das necesidades da súa área de influencia, kits de asesoramento en
novas tecnoloxías a emprendedores, identificación e difusión das
necesidades TIC aos provedores de solucións para as PEME e, tamén,
impulso de novas carteiras de servizos de asesoramento.