CO2 Smart Tech presentará en MATELEC o seu avanzado software para a xestión integral enerxética
venres, 14 de outubro do 2016
CO2 Smart Tech, empresa
galega de Enxeñaría e Tecnoloxía, vén de anunciarnos que estará
presente no salón
MATELEC 2016, especializado en solucións para a industria
intelixente e que se celebra en Madrid (IFEMA) do 25 ao 28 de
outubro. Durante a celebración deste evento, a firma galega amosará
as vantaxes e funcionalidades da súa tecnoloxía Cost-tem, sistema
avanzado de xestión enerxética integral que consiste, basicamente,
nun software avanzado de seguimento e xestión enerxética
unificadora baseado no cómputo na nube. Entre as súas capacidades
inclúese a de ser quen de integrar información con orixe en fontes
moi diversas, permitindo un control doado, sinxelo e eficaz sobre
todas elas.
Estas fontes poden ser sistemas de control (de
caldeiras, planta de frío, aire comprimido, etc), equipos de medida
e sensores (contadores de enerxía eléctrica, de auga, de vapor,
sensores de temperatura, humidade), bases de datos (ERP, sistemas de
produción, GMAO) e servizos web (mercado eléctrico, climatoloxía,
servizos de terceiros, etc). Segundo informa a empresa galega, a
implantación do sistema Cost-tem no tecido industrial e no gran
terciario ten como principal obxectivo “a redución, optimización
e seguimento de consumos enerxéticos e de recursos, con obxecto de
mellorar a competitividade das organizacións”.
Como lembraremos, CO2 Smart Tech é unha empresa
galega (con sedes en Oleiros e Bueu) de enxeñaría e tecnoloxía
adicada ao desenvolvemento de solucións avanzadas no eido da
eficiencia enerxética. Desde a súa orixe no ano 2010 ten
desenvolvido unha chea de proxectos en organizacións de referencia a
nivel nacional e internacional. Polo que atinxe ao salón MATELEC, é
o Salón Internacional de Solucións para a Industria Eléctrica e
Electrónica. Este ano desenvólvese baixo o lema Let’’s
Link-up, avogando pola
interconectividade precisa nos procesos industriais de produción,
enxeñaría e xestión.