CIS Galicia e CESGA organizan o 24 unha xornada sobre as oportunidades de Fortissimo 2 para as nosas PEME
luns, 17 de outubro do 2016
O
vindeiro 24 de outubro a sede GAIN en Santiago (Centro de Novas
Tecnoloxías de Galicia) vai acoller unha xornada dirixida a expoñer
as oportunidades (financiamento, beneficios e aplicacións) para as
PEME que abre o uso da computación. Trátase
do InfoDay Fortissimo 2, un evento dirixido a empresarios,
enxeñeiros e persoal técnico de pequenas e medianas empresas e
firmas con máximo de 3.000 traballadores (mid-caps) con
actividade en innovación. A organización deste evento corre a cargo
do CIS Galicia e do Centro de Supercomputación de Galicia (CESGA) en
colaboración coa axencia GAIN. Desenvólvese ao abeiro da segunda
convocatoria europea de experimentos sobre aplicacións baseadas en
alta computación (HPC) na nube para pequenas e medianas empresas, o
Proxecto Fortissimo 2.
Segundo
informa o CESGA, “esta convocatoria busca financiar experimentos
para estender e demostrar o potencial de negocio dun ecosistema de
servizos HPC (computación de alto rendemento) na nube, máis polo
miúdo para aplicacións que inclúan simulacións acopladas de
procesos físicos ou análise de datos de altas prestacións”. En
definitiva, o que se pretende é procurar novas experiencias que
complementen e estendan as actividades actuais do proxecto,
experimentos que estean enfocados a resolver necesidades de negocio
de PEME ou mid-caps do sector da enxeñaría ou da
manufactura.
O
financiamento máximo por iniciativa empresarial ascende a 175.000
euros (para todos os participantes). Segundo informa o CESGA, a
solicitude “resulta sinxela” xa que as propostas non poden
superar as 10 páxinas. As empresas que desexen solicitar
financiamento contarán co soporte do Centro de Supercomputación
para preparar a súa proposta (o centro, de feito, xa axudou a 23
empresas financiadas baixo este programa).
A
convocatoria pecha o 7 de decembro. Pódese
facer a inscrición a través da páxina web do CESGA, no apartado
adicado a Fortissimo II.
As
actividades ábrense ás 10.30 coa sesión de apertura a cargo de
Sonia Pazos, directora de Centros da Axencia Galega de Innovación
(GAIN). Logo, ao fío das 10.45, será a quenda de Javier García
Tobío, director xerente do CESGA. Máis tarde, contra as 11.00
horas, falará Ignacio López Cabido, subdirector técnico do CESGA,
e logo será a quenda de Javier López Cacheiro, técnico superior de
Sistemas do CESGA, quen falará de servizos avanzados de información
masiva (Big Data). A continuación será a pausa do café, e
media hora máis tarde, sobre as 12.00, falará de Fortissimo 2
Andrés Gómez Tato, responsábel de Proxectos do CESGA. Sobre as
12.30 será a quenda de Carmen Cotelo, técnica coordinadora de
Fortissimo (CESGA), quen fará un percorrido polas experiencias
previas do proxecto. Ás 12.50 horas intervirá Ignacio López Cabido
para falar de Sesame.net, a rede europea de centros de competencias
en HPC para PEME.