CEL Lugo creará unha plataforma virtual para favorecer o medre exterior das empresas da alimentación
luns, 14 de marzo do 2011
Tirar
proveito das redes e dos contornos colectivos de traballo e formación que estas
ofrecen, con vistas a facer en compaña de outras/os o que até o de agora había
que facer pola nosa conta. Este é un dos grandes obxectivos do proxecto Lan
Pymexport, iniciativa posta en marcha polo Departamento de Comercio Exterior
da Confederación de Empresarios de Lugo (CEL) para facilitarlles ás empresas
galegas e portuguesas do eido alimentario todo o traballo relacionado coa
procura de mercados externos. O proxecto en cuestión, iniciado ao abeiro do programa
europeo POCTEP, conta co apoio de ANFACO-CECOPESCA, a asociación galego-estatal
de conserveiros e principal beneficiara deste desenvolvemento xunto co Centro
Tecnolóxico da Carne (CETECA), o Centro
de Inovaçao de Tras-Os-Montes e Alto Douro (Citmad) e o Business Innovation
Centre do Minho (BIC Minho).
Entre os elementos que inclúe a iniciativa inclúese
unha estrutura compartida para a achega de servizos de aprendizaxe a distancia
(e-learning) especializada en cuestións
de internacionalización.
Isto será posibles grazas a unha plataforma virtual
que actuará de instrumento para a cooperación das empresas galegas e
portuguesas (arredor de cincuenta, todas elas ligadas á alimentación) e a súa
saída exterior con meirandes opcións de éxito. “Para lograr estes obxectivos”, informa CEL, “farase fincapé na cooperación e nos importantes niveis de
competitividade que se acadan a través dela”. Os pasos a seguir polo
proxecto comezarán coa captación e a selección das compañías participantes, pasándose
logo a unha segunda fase, a principal, que se apoiará na creación de grupos de
entre cinco e seis empresas que teñan produtos complementarios, achegándolles
asesoramento na posta en marcha de miúdas unidades de negocio ou comercialización
que lles permitan melloras de todo tipo: de presentación dos seus produtos, de
localización dos puntos exactos do mercado onde actuar, etc.
A terceira parte do proxecto incluirá o
desenvolvemento propiamente dito da plataforma virtual, paso definitivo para
facilitar a concorrencia real das unidades de negocio xeradas na fase previa. Segundo
indica CEL, trátase dun recurso técnico ao servizo de compradores profesionais
(maioristas, almacenistas e provedores) da Unión Europea, fornecéndoos de
procesos para facer o máis doado posible o peche de operacións comerciais
reais, optimizando recursos e minimizando custes. A posta en marcha da
iniciativa prolongarase até finais de 2012. A partir dese intre, buscarase que
as empresas beneficiadas teñen a capacidade precisa para desenvolver a súa
actividade internacional de xeito autónomo, ao tempo que serven de exemplo e de
modelo de formación para outras firmas que veñan detrás.