Brión convoca aos veciños para dixitalizaren o seu pasado
mércores, 5 de xuño do 2013
- As capelas do Tremo de Brión
En
concellos tan curtidos na Sociedade do Coñecemento como o de Brión,
se non é o Goberno local ou os investigadores da Universidade de
Santiago os que poñen en marcha iniciativas de desenvolvemento local
a través da Rede (granxafamiliar.com,
Infobrión), son os
propios veciños os que argallan cada pouco novos xeitos de tirarlle
partido ao dixital. E que mellor que recuperando o seu pasado a
través do rexistro e documentación de imaxes antigas da vida no
concello? De levar a cabo un proceso de recuperación de fotografías
do pasado brionés (unha práctica que xa ten dado sinais positivos
de normalización TIC entre os nosos maiores, neste e noutros
concellos) é do que trata a nova iniciativa da Asociación o Esquío
no Piñeiro, que xa reuniu e dixitalizou máis de 700 fotos nos
últimos tres meses.
A
iniciativa, levada a cabo en colaboración co Concello, diríxese a
preservar e conservar o patrimonio fotográfico brionés e mesmo
poder publicar un libro sobre costumes no municipio. Nestes tres
meses que levan recollendo fotografías, a asociación conseguiu a
colaboración de veciños e veciñas de todas as parroquias de Brión,
“polo
que a escolma de imaxes está a ser moi variada”,
informan os responsábeis da campaña. As
fotografías máis antigas recollidas datan da primeira década do
século XX e a gran maioría correspóndense con celebracións
relixiosas (vodas, comuñóns,
procesións...), festas e xuntanzas tradicionais, retratos de
familiares e amigos, partidos de fútbol... Asamde,
recolléronse tamén imaxes das distintas parroquias de Brión. Dende
O Esquío
no Piñeiro
lembran que os veciños e veciñas que queiran colaborar nesta
iniciativa que poden achegar as súas fotografías de dúas maneiras:
dixitalizadas a través do mail oesquio@gmail.com ou
ben persoalmente nas dependencias da Biblioteca Municipal do Concello
de Brión, onde as fotografías serán dixitalizadas e devolveranse
no mesmo intre.