Bota a camiñar o novo fondo de proxectos culturais de Política Lingüística: TeCe Redes en Galego
xoves, 7 de abril do 2022
A
Secretaría Xeral de Política Lingüística convocou a primeira
edición do novo repositorio de proxectos dixitais e presenciais
creado ao abeiro do Fondo de Proxectos Culturais Xacobeo 21-22.
Trátase dunha iniciativa, TeCe Redes en Galego, cuxo nome fala as
claras de cales son os seus obxectivos: poñer o foco nas novas
canles da comunicación, chegar de maneira máis directa á nenez e á
mocidade, crear comunidade arredor da nosa cultura e fomentar a
presenza do galego. A isto cómpre engadir a finalidade de favorecer
a transmisión xeracional. A versión estendida e ampliada do fondo
vén cunha cantidade inicial de 500.000 euros.
Os
detalles de repositorio foron dados a coñecer por Valentín García,
secretario xeral de Política Lingüística, quen destacou a boa
acollida recibida nas edicións anteriores pola iniciativa, centrada
agora, máis ca nunca, “en dinamizar o uso da lingua galega na
infancia e na mocidade mediante actividades dinamizadoras atractivas
e tamén a través dos novos espazos do universo dixital e
audiovisual”.
TeCe
Redes en Galego incorpórase como una nova sección dentro do Fondo
Xacobeo 21-22 co obxectivo de “transmitir, comunicar e tecer
redes”. Este último termo, explicou García, “refírese tanto á
canle dixital de comunicación social como á manifestación da
actitude colectiva de tecer redes susceptíbeis de estender o vínculo
afectivo co galego e de crear unha comunidade, cada vez máis ampla,
de persoas novas”.
Tamén
engadiu que a diferenza das anteriores convocatorias do fondo, que
incluían a modalidade de proxectos materiais, as propostas
presentadas poderán ser unicamente presenciais (orixinais e inéditas
ou non), dixitais (orixinais e inéditas) ou mixtas e a contía
máxima que poderá recibir cada un deles será de 10.000 euros.
Aberto
a empresas, cooperativas e profesionais do sector cultural
García
fixo saber que “todas aquelas empresas, cooperativas e profesionais
do sector cultural, creativo e artístico, vinculadas cos procesos de
dinamización da lingua galega no desenvolvemento da súa actividade,
poderán presentar as súas solicitudes entre os días 9 e 25 de
abril a través da Sede Electrónica da Xunta de Galicia”.
Outra
novidade respecto das anteriores convocatorias é que a dita
solicitude, da que pode verse un modelo anexo I da convocatoria, non
se presenta como tal a través do procedemento PR004A, senón que se
elaborará a través da aplicación web dispoñíbel no Portal
da Lingua Galega.
As
bases completas, así como o a guía do procedemento de
participación, poderán consultarse no Portal da Lingua Galega,
lingua.gal. Ademais, as persoas
interesadas poderán dirixir as súas dúbidas e consultas ao
teléfono 687 041 884 ou ao correo electrónico tcr-galego@xunta.gal.