Boa acollida do Sistema de Licitación Electrónica da Xunta (SILEX)
venres, 20 de maio do 2011
Seguindo a liña marcada polo
Executivo galego para modernizar tódolos procesos administrativos que se leven
a cabo coa cidadanía e coas empresas do país, a Consellaría de Facenda puxo en
marcha recentemente o seu Sistema de Licitación Electrónica (SILEX), que nos
primeiros días de funcionamento, xa foi empregado polo 20 por cento do total
das ofertas empresariais presentadas.
O titular do CIXTEC, Mauro Fernández
Dabouza, revelou hoxe os datos referentes a este servizo telemático, e cualificou
de “boa” a resposta das empresas aos
cinco primeiros expedientes que saíron a licitación.
Máis polo miúdo, na súa
intervención manifestou que se acadaron as seguintes porcentaxes de
participación por medios telemáticos: no Sistema de Información Contable, un
33, 3por cento das ofertas; no Sistema de
Información Tributario, un 50 por cento das ofertas; e no Sistema de Información
de Recursos Humanos, un 20 por cento. Tan só nos Sistemas de Información de
Nómina e de Xestión de Inventario de Patrimonio, apuntou, “aínda non se presentaron ofertas por medios telemáticos”.
O que hai que salientar de todo
o exposto por Dabouza, é que o 20 por cento do conxunto das ofertas foron
presentadas empregando o Sistema de Licitación Electrónica, o que supón un paso
importante do departamento que dirixe Marta Fernández Currás na liña trazada
polo goberno da Xunta para “acadar unha
administración máis áxil, eficiente, moderna e próxima á nova realidade das
empresas e da cidadanía”.
Igual que xa se fixo co Sistema
de Facturación Electrónica, o SILEX vaise pór en funcionamento de forma
consecutiva nas distintas consellerías da Xunta de Galicia, segundo afirmou
Mauro Fernández, “de acordo co plan que
xa está elaborado”.
O funcionamento de dito sistema principiou no CIXTEC, coa posta en marcha dos
cinco primeiros expedientes mencionados anteriormente, e neste intre, xa están
a licitarse outros dous máis con posibilidade de presentación telemática de
ofertas. Posteriormente, seguirase coa
Secretaría Xeral de Modernización e Innovación Tecnolóxica para, de seguido,
continuar cos expedientes relativos a Tecnoloxías de Información do resto das consellerías
hasta estender o sistema a totalidade dos procedementos de contratación da
Xunta de Galicia.