Blusens acode a CES para presentar a súa proposta de fogar dixital

Se hai algo do que se fala estes días en todos os medios de comunicación do mundo que traten a cuestión dixital é da feira CES que se está a celebrar dende onte nos Estados Unidos. Pois ben, para quen crea que xa está ben de tanto seguimento, dende aquí lle advertimos de que, en troques dunha cunca, vai haber dúas. Con todo, que volvamos sobre o tema ben pode estar xustificado se do que se trata é de dar conta da presenza galega por aquelas terras. Segundo nos contan fontes da firma Blusens, a experiencia do ano pasado na feira de Las Vegas foi abondo positiva como para que se recunque. E así é: dende onte fica aberto no evento tecnolóxico (se cadra o máis importante do mundo no seu ámbito) o stand da compañía tecnolóxica compostelá para tódolos visitantes, especialistas e público en xeral, dende o que se informará polo miúdo da experiencia Fogar Conectado, unha das máis ambiciosas apostas da empresa galega e que consiste nun paso adiante a partir do concepto de fogar dixital.
Un concepto que, para írmolo entendendo, fica lonxe da arela robótica dos primeiros días do despregue TIC e do conxunto de trebellos que a tecnoloxía quixo dispor nos nosos ámbitos domésticos sen un orde concreto. O que achega Blusens seguen a ser elementos, pero coa diferenza (entre outras diferenzas) de que agora hai cerebro dixital: o Blubrain. Esta tecnoloxía é, por así dicilo, o centro do que se podería entender como un ecosistema tecnolóxico ao servizo do lecer e da información, integrado por diferentes elementos e achegando distintas linguaxes (cinema, música, Televisión Dixital Terrestre, IPTV) en calquera recanto do noso fogar, e mesmo fóra del (de xeito remoto). O stand de Blusens, o número 13544, está situado no edificio Main Central Hall, moi preto dos emprazamentos de compañías como Samsung, Toshiba ou Sony. Ao longo dos catro días que dura a feira, a firma galega levará a cabo todo tipo de demostracións sobre a súa tecnoloxía de Fogar Conectado, amosando amais os detalles da súa gama de produtos, “creados para revolucionar o mercado actual e futuro do lecer doméstico”, sinala a compañía. Por certo que desta volta está prevista a asistencia de Miguel Silva, cofundador da empresa, e Miguel Churruca, director de Marketing.