Balidea supera a cifra dos 200 traballadores e os sete millóns de euros de negocio
mércores, 19 de marzo do 2014
A empresa galega Balidea,
da que falamos recentemente para dar conta do proxecto desenvolvido
co CESGA para
materializar unha plataforma de apoio a coidadores informais
(familiares próximos) de persoas con demencia, vén de facer reconto
do acadado no seu seo en materia de creación de emprego e busca de
novos mercados. No seu autoexame, a empresa lembra que os
froitos recollidos agora responden a unha folla de ruta iniciada en
xullo de 2008 e que culmina en 2013 “co cumprimento de todos os
seus obxectivos estratéxicos, baseados no medre, a diversificación
da actividade, o afianzamento no mercado e a responsabilidade
social”. Xa en termos máis concretos, Balidea informa que vén de
superar a cifra de 200 traballadoras e traballadores.
Asemade, deixou atrás a
liña dos sete millóns de euros de negocio, “feito que marca un
fito na traxectoria desta empresa funda en 2002”, engaden os seus
responsábeis. E explican: “Só durante o ano 2013 foron creados
máis de 70 novos postos de traballo; máis alá do dato
cuantitativo, a porcentaxe de contratos cunha duración indefinida na
empresa supera o 80% nestes momentos, feito que constata que a
estabilidade e a calidade laboral é un dos principios que rexe a
xestión empresarial de Balidea”.
Lembrar tamén que en
2008 a empresa abriu as portas da súa sede corporativa en Santiago,
amais de pór en marcha o devandito plan estratéxico, que tivo a
súas ramificacións na apertura de novos centros en Vigo, Bilbao e A
Coruña, apertura que respondeu ao obxectivo de estreitar a relación
cos clientes e cos centros de toma de decisións.
Respecto ao futuro, a
empresa galega sinala que “continuará coa estratexia de
internacionalización da actividade” e proseguirá desenvolvendo e
aplicando “o seu novo plan estratéxico”, unha nova etapa que
afianzará os logros dos cinco anos anteriores e fortalecerá a arela
de Balidea de “converterse nunha empresa de referencia para o
sector das TIC en todo o territorio europeo”. Sobre este último
punto, dicir que a compañía xa ten decidido establecerse noutros
tres países da Unión co fin de “continuar coa súa expansión e
estratexia de proximidade”. Isto complementarase con outros dous
centros produtivos, con novos contratos de traballo e cunha previsión
laboral, para vindeiro quinquenio, que pasaría por duplicar o
persoal da empresa até aproximarse ao medio millar de traballadores.