Ayco sobe un novo chanzo en estratexia internacional coa súa misión a México
luns, 14 de outubro do 2013
- O BlackPen de Ayco, unha das tecnoloxías presentadas ás empresas do país azteca
A empresa galega Ayco
informou este luns de novos pasos dados en materia de
internacionalización da súa actividade. Máis polo miúdo, trátase
da súa primeira misión comercial a México, onde a firma TIC con
sede en Vigo ten o obxectivo de coñecer posíbeis compañías
colaboradoras na capital (Distrito Federal) e máis na cidade de
Querétaro (coa que, lembraremos, as
nosas empresas teñen xa relación dende hai anos, en boa medida
grazas á asociación INEO). A misión de Ayco en México,
informan fontes da compañía, representa “un paso máis na súa
estratexia comercial internacional tras o seu paso por outros países
como Panamá”.
En total, Ayco presentou
unha escolma dos seus produtos e servizos a unha ducia de empresas do
ámbito TIC do país azteca co fin de establecer posibles sinerxías.
Segundo o xerente da empresa galega, Fernando Campos, “a nosa
tecnoloxía tivo moi boa acollida e agardamos que este sexa o comezo
dunha frutífera relación entre ambos os países”.
Por certo que Ayco
centrou os seus esforzos en amosar a súa experiencia no emprego da
tecnoloxía NFC, aplicada ao control de presenza ou á xestión de
activos, e o sistema de bolígrafo dixital BlackPen. Segundo nos
conta a empresa galega, as empresas mexicanas, ao fío dos ditos
recursos presentados, salientaron “a súa novidade e a súa
facilidade de implantación”.
Lembremos que a
aplicación BlackPen permite transmitir todo o que se escribe sobre
un papel a un sistema informático en tempo real, replicando o
documento manuscrito orixinal e os datos ou accións que se incluíron
ao cubrir a folla, simplemente, empregando elementos tan tradicionais
como o bolígrafo e o papel. Doutra banda, a tecnoloxía NFC
posibilita o intercambio de datos entre dispositivos a curto alcance.
Non está dirixida á transmisión masiva, como o WLAN (Wi-Fi) ou
Bluetooth, senón á comunicación entre dispositivos con capacidade
de proceso de datos como teléfonos móbiles, PDA ou PC, “polo que
é unha tecnoloxía complementaria a estas que actualmente se pode
aplicar a diferentes ámbitos”, engade Ayco.
Por certo que esta misión
mexicana non é a primeira experiencia internacional da empresa
tecnolóxica galega, que xa en 2008 participou nunha iniciativa de
I+D+i a nivel europeo: o Proxecto ATOM, cuxo obxectivo foi o de
desenvolver un novo sistema que dese resposta ás necesidades de
seguridade dos transportes públicos, postas de manifesto tras os
atentados do 11 de setembro e da tentativa de atentado do aeroporto
de Heathrow, Londres, en 2006. “Ayco foi a única empresa española
que participou no proxecto, xunto con outras compañías e
universidades de Italia, Holanda, Grecia, Alemaña ou Romanía”,
lémbranos a firma de Vigo.