Avaaz.org suma unha comunidade de 2,5 millóns de persoas en 30 días
venres, 24 de febreiro do 2012
A comunidade
Avaaz.org, centrada en tirar
partido das redes para incrementar o alcance de todo tipo de
mobilizacións sociais a nivel mundial, vén de facer reconto do
acadado ao longo das pasadas semanas con motivo dun obxectivo común
contra o que loitar: as
iniciativas lexislativas ACTA e SOPA
para limitar as liberdades de comunicación e de información en
Internet. Deste xeito, ao longo do último mes e ao abeiro das
distintas mobilizacións contra as ditas leis xeradas dende
Avaaz.org, e tamén contra as ditaduras dos países árabes e outras
cuestións, a comunidade medrou en 2 millóns e medio de persoas.
“Se antes xa eramos o
movemento político cidadán pola Rede máis grande da historia,
agora estamos a medrar a unha velocidade que xa non ten precedentes”,
informan fontes da plataforma.
Por certo que as
diferentes mobilizacións postas en marcha manifestáronse de moi
diverso xeito: emprendendo recollidas masivas de sinaturas,
solicitando doazóns ou achegando informacións aos medios. Estas
accións desenvolvidas nos pasados trinta días, sinala Avaaz.org,
representan un número maior cás realizadas de xeito común ao longo
dun ano. Pero hai máis datos. Por exemplo, aproveitouse o potencial
de Avaaz, que medra de xeito expoñencial, para facer unha recadación
que de outra maneira, sen o factor redes, sería imposíbel: a de 1,8
millóns de dólares para subministros médicos para Siria, achegados
de contrabando.
Asemade, xeráronse catro
de millóns de dólares a través de Internet para aumentar o impacto
do traballo da plataforma, lanzáronse máis 40 campañas e se
compartiron iniciativas con 25 millóns de seareiros sobre as máis
variadas temáticas: o avance da deforestacióndo Amazonas ou o
escándalo de Rupert Murdoch en Reino Unido.