Aumentan nun 55% os usuarios da app do Camiño
luns, 3 de setembro do 2018
A
aplicación do Camiño de Santigo segue en curva ascendente. Esta
mesma fin de semana tivemos un reconto de actividade da ferramenta
móbil que non fixo máis que corroboralo. Segundo
nos conta Turismo de Galicia, o número de peregrinos que utilizan a
app do Camiño de Santiago subiu máis dun 55% este ano.
Ademais, até o mes pasado tivo 9.500 novas descargas, sumando máis
de 30.000. Estas cifras, segundo confirman Turismo de Galicia e a
axencia AMTEGA, impulsoras da ferramenta posta en marcha en maio de
2016, confirman a “utilidade da aplicación”.
As
dúas entidades tamén salientan, entre os datos máis relevantes e
significativos, o tempo medio de cada sesión, que foi de 4,45
minutos, un indicativo do “interese dos contidos achegados pola
aplicación”, que, como lembraremos, subministra datos en tempo
real das distintas rutas en Galicia e está dispoñíbel de balde
para as plataformas iOS e Android, nos seguintes idiomas: galego,
castelán e inglés.
Entre
os dez países que acumulan máis descargas atópanse España,
Italia, Portugal, Estados Unidos, Reino Unido, Alemaña, Brasil,
Francia, Australia e México, con incrementos xeneralizados na maior
parte deles.
Como
dixemos, foi no mes de maio de 2016 cando Turismo
Galicia e a Axencia para a
Modernización Tecnolóxica de Galicia (AMTEGA) presentaban a
aplicación
móbil do Camiño de Santiago. Esta app xurdía ao
abeiro do proxecto Smart Camiño e o seu obxectivo era pór ao
alcance da man dos peregrinos unha guía completa sobre as rutas
oficiais do Camiño de Compostela dende a súa entrada en Galicia
(Camiño Francés, Ruta Fisterra-Muxía, Vía da Prata, Camiño
Portugués, Camiño Inglés, Camiño Primitivo, Camiño do Norte,
Ruta do Mar de Arousa e Río Ulla, ou Camiño de Inverno).
Entre
outros moitos recursos, a ferramenta dispón dunha listaxe da Rede
Pública de Albergues (características, horarios, localización,
teléfono e fotografías); información sobre os eventos culturais
(festas, concertos, obradoiros...), información de todos os recursos
turísticos (descrición, localización e imaxes), suxestións para
comer, aloxarse e que visitar.
A aplicación, que na maior
parte das súas funcións non precisa de cobertura no móbil, achega
información meteorolóxica (fornecida por Meteogalicia) así como
datos de contacto e enderezo dos centros de saúde e
emerxencias.
Esta plataforma dixital conta cun servizo de
realidade aumentada que permite, a través da cámara do móbil,
visualizar todos os puntos de interese situados nas proximidades.