Aula Smart agasalla portátiles por participar no seu curso sobre TIC na educación

A Fundación Aula Smart vén de anunciar a inminente posta en marcha co seu curso Novas Tecnoloxías aplicadas á Educación, que comeza o 1 de outubro e que xa ten aberto neste intre o prazo de matrícula (até o día 24). A actividade formativa, que se levará a cabo na súa integridade a través da plataforma virtual da dita Fundación, ten un importante valor engadido de cara ao afianzamento das novas ferramentas no eido da educación: os docentes de centros concertados e privados que se matriculen recibirán de balde un computador portátil. O curso, que ten un prezo de 660 euros (bonificables a través dos seguros sociais dos centros), abrangue eidos tecnolóxico-formativos como o deseño de presentacións e páxinas web, a inclusión das TIC no desenvolvemento de competencias básicas ou a importancia das redes sociais.
O curso está homologado polo Ministerio de Educación con 10 créditos, e conta co apoio en financiamento do Fondo Social Europeo e máis do INEM. Segundo se reflicte na web da Fundación, un bo número de colexios galegos xa tiveron experiencia con esta actividade formativa, entre os que se contan o Colexio Divina Pastora de Ourense, o Colexio Fillas da Natividade de María de Betanzos, o Colexio San Xosé de Pontevedra ou a Fundación Compañía de María da Coruña.