AtlantTIC amosará ante as empresas os beneficios das redes 5G en colaboración con Cradlepoint
luns, 6 de febreiro do 2023
A
Universidade de Vigo (centro AtlantTIC)
impulsa a investigación sobre as vantaxes das redes privadas de
última xeración a través das solucións de Cradlepoint, firma
internacional centrada en redes sen fíos LTE e 5G entregadas na
nube. Máis en detalle, o Laboratorio 5G de AtlantTIC conta coa
tecnoloxía de Cradlepoint para estudar os diferentes beneficios que
as redes privadas poden achegar ás empresas españolas, mostrando
casos de uso ao redor do campus, así como simulando un escenario
idóneo onde se mostren novos exemplos concretos de aplicación
destas redes.
No
proxecto tamén participa a Xunta, a través da axencia AMTEGA e do
operador público autonómico RETEGAL. A súa orixe está no empuxe
experimentado pola evolución das redes privadas e no interese que
estas suscitan, ao que se suma a vontade de saber até onde poden
chegar as redes 5G á hora de conectar maquinaria, robots, e todos os
procesos de automatización das empresas.
Cradlepoint
explica que “un caso común dentro das empresas de calquera sector
é que o seu Wi-Fi teña problemas de escalabilidade, é dicir,
problemas ao soportar un gran número de dispositivos, de cobertura,
debido ás restricións impostas por usar unha frecuencia compartida;
así como de mobilidade, ao facer o cambio dunha antena a outra
(handover)”. En contraposición, engade a compañía, “as
redes privadas permiten que o número de antenas necesarias sexa
moito menor que nunha rede Wi-Fi, que a mobilidade sexa unha parte
central da solución e que os dispositivos conectados non teñan
colisións ao transmitir ou recibir datos”.
Felipe
Gil Castiñeira, profesor titular da Escola de Enxeñería de
Telecomunicación e investigador de AtlantTIC (Centro de
Investigación en Tecnoloxías de Telecomunicación impulsado pola
Universidade de Vigo) recoñece que “o sector industrial enfróntase
continuamente á necesidade de ser máis competitivo. O paradigma da
Industria 4.0 propón conseguir a mellora do sector grazas á
obtención e a análise de máis información e de forma máis
rápida. As tecnoloxías de comunicación 5G e as súas futuras
evolucións son elementos clave para dotar ás máquinas e ás
persoas tanto coa capacidade de enviar esa información, como de
analizala e recibila”. E engade: “Neste escenario, a colaboración
con Cradlepoint permítenos traballar con produtos comerciais
punteiros e de alta calidade para redes industriais privadas 5G”.
Grazas
a este proxecto académico, explican, será factíbel mostrar os
beneficios que as redes privadas poden achegar a industrias verticais
(como a automoción), dotar de dinamismo ás redes, ademais de
mellorar e validar as estratexias de slicing, edge
computing, reconfiguración dinámica das redes, orquestración,
etc. Segundo o Laboratorio 5G, Cradlepoint é “agora mesmo unha das
poucas empresas que está a achegar solucións que cumpren estas
características”. Ademais, engaden, os seus routers
permiten comprobar tanto as prestacións das redes privadas nas
contornas de proba, como comprender mellor as características (en
canto a comunicación) dos distintos casos de uso e escenarios que se
avalían.
A
Universidade de Vigo desexa, liderando este proxecto, mostrar os
beneficios que pode achegar o uso das redes PCN dentro de sectores
locais como a loxística, a industria, a administración pública, o
comercio, a sanidade e a hostalería.
Daniel
Morros, enxeñeiro de vendas en Cradlepoint Iberia engade:
“Actualmente en España utilízanse redes Wi-Fi para todo tipo de
aplicacións, aínda que non sempre garanten unha boa comunicación
en zonas extensas, con gran número de dispositivos ou nas que é
necesario asegurar a calidade dos servizos. Grazas a Cradlepoint é
posíbel dispoñer dunha maior calidade de servizo, así como ofrecer
servizos diferenciados ás comunicacións máis críticas por medio
do network slicing. Durante este proxecto existen intereses
secundarios por parte da institución pública, como facer un
handover a unha rede comercial e manter conectividade fóra da
rede privada ou usar esta tecnoloxía para mellorar a produtividade
en fábricas de automoción, incrementar a automatización e ter
mellor control sobre os procesos industriais”.
Á
súa vez, Lorenzo Ruggiero, director de área para Europa Meridional
de Cradlepoint, conclúe que “as universidades son un
extraordinario viveiro de talento e innovación para calquera ámbito,
incluído o mundo das ITC. A 5G, a primeira xeración de tecnoloxía
sen fíos que ofrece aplicacións moito máis alá do uso exclusivo
do consumidor, é unha ferramenta ideal na dixitalización da
sociedade. E, nese marco, as redes privadas tamén están a cobrar
forza porque permiten acceder a unha cobertura móbil 5G de alto
rendemento en interiores e exteriores, o que as fai especialmente
axeitadas, por exemplo, para o sector industrial e para os campus
educativos. Por iso, para nós é un orgullo colaborar coa
Universidade de Vigo no desenvolvemento de proxectos de innovación
5G“.
Por
certo que a
investigación nestas tecnoloxías está na orixe da xornada que
preparou AtlantTIC para este 16 de febreiro, en streaming
e a partir das 18.00 horas.