AtlantTIC abre este venres a campaña de divulgación cidadá dos centros singulares da UVigo
martes, 12 de novembro do 2019
Os centros singulares de investigación da
Universidade de Vigo abrirán de novo as súas portas á cidadanía a
partir deste venres 15 de novembro, e farano ao abeiro da segunda
edición do programa Divulgando Ciencia Singular. Estamos a falar
do Centro de Investigación en Tecnoloxías de Telecomunicación
(AtlantTIC), o Centro de Investigación Mariña (CIM), o Centro de
Investigacións Biomédicas (CINBIO) e o Centro de Investigación en
Tecnoloxías, Enerxías e Procesos Industriais (CINTECX).
Os
centros desenvolverán ao longo dos meses de novembro e decembro un
programa de actividades que permitirá coñecer de primeira man o
traballo que se fai nestes centros. Segundo explica Belén Rubio,
vicerreitora de Investigación, “son centros con centos de
investigadoras e investigadores que durante anos foron quen de captar
decenas de millóns de euros en proxectos e contratos de I+D, de
rexistrar ducias de patentes e sumar miles de publicacións, e malia
todo ese esforzo dedicado e dos froitos recollidos, a sociedade
apenas coñece nin recoñece a súa labor”.
De
balde e previa inscrición na web cienciasingular.gal,
calquera persoa, tanto adulta como nenos e nenas, poderá participar
neste programa de actividades para toda a familia financiado pola
Secretaría Xeral de Universidades.
Divulgando
Ciencia Singular arrancará este venres 15 de novembro na Escola de
Enxeñaría de Telecomunicación, onde, de 16.00 a 19.00 h,
investigadoras e investigadores de AtlantTIC desenvolverán unha
ducia de obradoiros e tres visitas guiadas a espazos destacados do
centro. Segundo sinala Carlos Mosquera, director do centro de
investigación, “aquí abórdanse numerosos retos da sociedade con
tecnoloxías de telecomunicacións, en ámbitos como a saúde, o
medio ambiente ou a seguridade en comunicación, estas tecnoloxías
están presentes nas nosas vidas máis do que imaxinamos, ás veces
de formas insospeitadas, e vemos necesario contribuír á súa
difusión, xa que como sociedade necesitamos coñecer para opinar con
criterio”.