Até 470 pemes participaron na xira de GAIN e o IGAPE para fomentar a innovación
mércores, 20 de abril do 2022
O
Centro
de Investigacións Agrarias de Mabegondo, no concello coruñés de
Abegondo, acolleu este mércores 20 de abril o último encontro da
iniciativa Camiño de futuro, posta en marcha pola Xunta
(a través de GAIN e o IGAPE) para difundir entre as pemes de
contornas non urbanas os instrumentos de apoio autonómicos para
mellorar a súa competitividade e crecemento. Na cita participou a
directora da Axencia Galega de Innovación, Patricia Argerey, que
lembrou, facendo un algo de balance, que Camiño de futuro foi
unha xira de 14 etapas nas catro provincias galegas e que nelas
participaron 470 pemes e persoas autónomas, informándose das axudas
autonómicas dispoñíbeis e, tamén nalgúns casos, mostrando casos
de éxito.
Patricia
Argerey destacou que o obxectivo destes encontros, que se inscriben
no Programa de Impulso á Innovación nas Pemes, foi “animar ás
pequenas e medianas empresas a iniciar o camiño da innovación”,
para ser máis competitivas e medrar, así como para facer fronte aos
retos globais actuais que dificilmente se poden abordar sen
innovación. “As pemes son o motor da economía galega e, por iso,
acompañalas nesta senda é unha prioridade para a Xunta de Galicia”,
sinalou Argerey.
A
directora de Gain animou ás empresas asistentes a presentarse ás
convocatorias InnovaPeme e DeseñaPeme. A primeira delas, dixo, “vai
destinada a incrementar a capacidade innovadora das pemes e
microempresas galegas a través de actividades integradas en plans de
innovación, e está aberta ata o vindeiro 18 de maio”. Pola súa
banda, DeseñaPeme, que apoia a incorporación do deseño como
elemento estratéxico nas organizacións como unha ferramenta
imprescindible para a innovación, está previsto que se publique
mañá no Diario Oficial de Galicia (DOG) e terá aberto desde o
venres (22 de abril) o prazo de solicitude ata o vindeiro 23 de maio,
engadiu Argerey, quen tamén puxo o foco noutras iniciativas do
Programa de Impulso á Innovación nas Pemes, como as liñas de
axudas pensadas para empresas tradicionais e sectores maduros que
queiran empezar a innovar; a difusión da cultura da innovación para
incrementar o número de pemes innovadoras; o desenvolvemento de
contidos formativos e ferramentas para que as pemes poidan avaliar a
súa capacidade para innovar; a difusión de casos de éxito de
empresas innovadoras da contorna e o asesoramento personalizado.
No
encontro celebrado en Abegondo, persoal de GAING e do IGAPE, da
Subdirección Xeral de Acuicultura da Consellería do Mar, así como
do Grupo de Desenvolvemento Rural (GDR) Mariñas-Betanzos explicaron
as diferentes convocatorias de axuda activadas pola Xunta.
Ademais,
presentáronse casos de éxito empresarial con pemes innovadoras da
contorna procedentes de diferentes sectores, que falaron da súa
experiencia como beneficiarios de distintos instrumentos de apoio da
Administración para que a empresa mellore a súa competitividade a
todos os niveis. En concreto, estiveron representantes da empresa
Panadería da Cunha de Carral e de Altavela Servicios Náuticos,
compañía de servizos náutico-deportivos de Sada.