Até 172 edificios repartidos por todos os barrios de Vigo serán nodos intelixentes
mércores, 29 de decembro do 2021
A
semana pasada a Delegación do Goberno en Galicia e o Concello de
Vigo deron a coñecer detalles relevantes do plan para converter a
cidade nunha Smart City, máis sustentábel, máis eficiente,
mellor conectada e con meirande calidade de vida para a cidadanía.
José
Miñones, delegado do Goberno en Galicia, informou da apertura da
licitación do proxecto que converterá 172 edificios vigueses en
nodos intelixentes, a través dunha iniciativa conxunta entre as
dúas administracións e contándose cun financiamento de 4,6 millóns
de euros. Miñones salientou que o investimento do Goberno permitirá
situar a urbe galega “á vangarda das cidades españolas” e
convertela “nun territorio intelixente, verde e eficiente”.
Tamén
lembrou que o proxecto en cuestión (Vigo edificios intelixentes.
Unha cidade para as persoas. accesíbel, eficiente e
comprometida) será financiado
polo Goberno de España nun 80% e polo Concello no 20%
restante. Asemade, engadiu que os 172 edificios dixitalizados e
conectados serán capaces de medir diferentes variábeis: ambientais,
de satisfacción global, de seguridade ou de calidade de vida. Estes
datos serán comunicados á plataforma Vigo Smart City coa finalidade
de producir fluxos de información que melloren os servizos públicos
e o seu alcance e eficacia.
O
prazo de recepción de ofertas para este proxecto estará aberto ata
o 22 de xaneiro de 2022 e a apertura de ofertas realizarase o día 5
de abril de 2022. O contrato terá unha duración de 20 meses.
O
delegado do Goberno indicou que, xunto con Vigo, o Ministerio de
Asuntos Económicos impulsará proxectos piloto similares noutro sete
cidades españolas, entre as que está tamén A Coruña. As oito
cidades foron seleccionadas na convocatoria de Proxectos Pilotos de
Edificios Intelixentes, de Red.es. Con estes proxectos pilotos,
poderase obter información real da aplicación das tecnoloxías á
mellora da calidade de vida e da xestión dun edificio.