Até 1.800 profesionais da programación participarán esta semana no encontro Codemotion

Esta semana comeza un dos encontros de meirande renome europeo en materia de programadores. Falamos de Codemotion, cuxos organizadores agardan contar para esta nova edición con máis de 1.800 participantes (un 15% máis ca na segunda edición, a anterior, celebrada en Madrid). A cita de dous días servirá, entre outras cousas, para “amosar as últimas tendencias no sector do software”. E todo isto da man de especialistas en creatividade informática como Ilya Grigorik de Google, Christian Heilmann de Mozilla, Bruce Lawson de Opera ou Pamela Fox de Khan Academy.
O evento Codemotion, cualificado polos seus responsábeis como “un evento de dimensións épicas aberto a todas as linguas e tecnoloxías”, abranguerá clases maxistrais, obradoiros e charlas, da man das comunidades e das empresas colaboradoras.
Ao fío do devandito, a organización sinala que se vai contar con boa parte das comunidades de desenvolvedores de España. Entre elas, GDGs, JavaHispano, Mozilla Hispano, Agile Spain, PHP Valencia, HTML5 Spain, Node JS, IOT Madrid, Phyton Madrid ou W3C. O encontro desenvolverase os días 21 e 22 na Universidade San Pablo (CEU), do Campus de Montepríncipe, en Boadilla del Monte (Madrid). O seu programa de actividades dá acubillo a máis de 112 charlas, 14 obradoiros, 33 comunidades, 95 relatores e 10 tracks. Por temas, trataranse cuestións como o desenvolvemento web e móbil ou a computación na nube.