Até 1.002.000 fogares e empresas da nosa terra están xa en disposición de conectarse a R
martes, 17 de decembro do 2019
Co
gallo de estarmos en plena recta final de 2019, R quere facer reconto
dos seus avances en materia de equipar aos municipios galegos de
redes ultrarrápidas de Internet a través de fibra óptica
(tecnoloxía FTTH de última xeración). Segundo fai saber a
operadora de cable de raizame galega, o ano está a piques de pechar
con 808.000 fogares e 194.000 negocios conectados á devandita rede
avanzada de seu, o que significa que a compañía foi quen de superar
o fito do millón de residencias particulares e empresas preparadas
para recibir os seus servizos de última xeración. En total,
1.002.000 domicilios e negocios da nosa terra. Podemos
consultar a cobertura de fibra óptica, ao detalle, no mapa
habilitado pola empresa de cable.
A
compañía de telecomunicacións tamén deu a coñecer que o
investimento aplicado no despregue das ditas infraestruturas en
Galicia ao longo de dúas décadas superou os 1.300 millóns de
euros, chegando a 134 concellos da Comunidade.
Por
outra banda, da devandita cifra de 1.002.000 de fogares e empresas
conectados á fibra de R, ao redor de 300.000 clientes gozan nestes
momentos de accesos a Internet de até 500 Mbps entre outros servizos
avanzados.
R
desenvolve neste intre varios proxectos das adxudicacións do
Programa de Extensión da Banda Larga de Nova Xeración do Ministerio
de Economía e Empresa, co que se promove o despregue de FTTH (fibra
até o fogar) nas chamadas “zonas brancas”, é dicir, as que
nunca dispuxeran de accesos de alta velocidade até este momento.
Cando se completen os traballos de cobertura dos proxectos do Plan
PEBA-Plan Avanza adxudicados a R en 2016 e 2018, o investimento total
realizado (tanto en novas localidades como nas que xa había rede de
R) alcanzará os 18 millóns de euros, co-financiados polos fondos
FEDER da Unión Europea a través de devandito programa.
A
compañía galega tamén engade que en virtude das adxudicacións de
2016, cun investimento de 8 millóns de euros, ao redor de 33.000
fogares e negocios das “zonas brancas” uniranse a ese millón
longo dos que hoxe están en disposición de recibir os servizos
avanzados de R en Galicia. A maiores, outras 32.000 residencias
particulares e empresas tamén ficarán conectadas ás redes de nova
xeración de R ao rematar as actuacións dun segundo plan PEBA-Avanza
adxudicadas ao operador galego polo Ministerio de Economía e Empresa
o ano pasado para igualmente achegar a tecnoloxía FTTH a diversas
zonas da xeografía galega que nunca dispuxeran de accesos
ultrarrápidos.
Estes
despregues, cun investimento adicional de 10 millóns de euros, están
subvencionados así mesmo polos Fondos FEDER da Unión Europea. Desta
maneira, ao final de ambos os plans, antes de 2021, preto de 65.000
novos fogares e negocios ficarán preparados para recibir os servizos
avanzados do operado galego.
Até
500Mb e servizos avanzados nunha vintena de novas localidades
Froito
de todos estes traballos, só en 2019 poden acceder á rede de R a
velocidades de até 500 Mbps domicilios e empresas de núcleos de 11
novos municipios galegos, aos que cómpre sumar outra decena deles
conectados en 2018. Así, na provincia da Coruña R levou
recentemente as súas redes de nova xeración aos concellos de
Abegondo, Cerceda, Muros, Camariñas, Ortigueira, Curtis ou Porto do
Son. En Lugo, a Lourenzá, Monterroso, Palas de Rei, Barreiros e
Guitiriz. Na provincia ourensá conectáronse á rede de fibra de R
núcleos dos municipios de Petín e Pobra de Trives e en Pontevedra
os de Ribadumia, Meaño, Cuntis, Ponte Caldelas, O Rosal, Tomiño ou
Moraña. Doutra banda, R aumentou a súa presenza noutros municipios
onde xa estaba coa súa rede de fibra como Miño, Cambre, Culleredo,
Oleiros, Arteixo, Ferrol, Neda, Poio (Combarro), Pontevedra, Vigo, A
Guarda, Ordes, Santiago de Compostela, San Cibrao das Viñas,
Arteixo, Nigrán, Vigo, Cervo, Sanxenxo, Redondela, Mugardos e
Boqueixón. E as previsións falan doutros despregamentos en 2020, en
núcleos dos municipios de Cariño, Muxía, Antas de Ulla, Valga e
Vilaboa.
Ademais
deses accesos a Internet con “megavelocidades garantidas”, as
zonas activadas poderán gozar tamén do desco 4k da
televisión dixital de R, alta definición co servizo Rebobina
para ver a tele “como e cando se queira”. Así mesmo, os clientes
de R poderán aforrar no seu plan de datos móbiles e conectarse de
balde a milleiros de puntos da rede WifiClientes R diseminados pola
xeografía galega.