As xornadas hubNet poñen o foco no potencial das TIC para a fortaleza do comercio
martes, 28 de novembro do 2023
O
ciclo Constrúe o teu futuro na era dixital da iniciativa
dixital hubNet, liderada pola Cámara de Comercio de Pontevedra,
Vigo e Vilagarcía de Arousa, entra na súa terceira semana de
actividade, na que están programadas un total de catro novas
conferencias e seminarios que esta vez poñerán o foco na análise
de datos a gran escala (Big Data e na dixitalización do
sector do comercio. Este foi o tema central da xornada técnica
celebrada este 28 de novembro na sede da Cámara de Comercio en
Vilagarcía, coordinada por Santiago García, director da firma de
servizos técnicos Stin.
Na
sesión abordáronse solucións TIC para a mellora da xestión do
comercio. O experto de Stin afirmou que “a tecnoloxía xoga un
papel fundamental para este sector, permitindo unhas maiores
eficiencia, precisión e competitividade dos negocios.
Nunha
presentación de carácter moi práctico, Santiago García debullou o
tipo de tecnoloxía básica que requiren as empresas, e explicou a
necesidade de dimensionar adecuadamente os equipos informáticos á
medida de cada unha. “Así”, dixo, “para unha micropeme podería
ser suficiente un servidor que permita compartir arquivos, a xestión
de correos, o acceso remoto e as copias de seguridade; mentres que
para empresas máis grandes hai que ter en conta as necesidades do
teletraballo, a xestión de varias sucursais, moitos niveis de
usuarios e un gran volume de traballo”.
O
experto tamén incidiu en que é “crucial” contar cunha estrutura
eficiente en aspectos tan básicos como o cableado, que executado de
forma axeitada facilita os mantementos e reparacións. Ademais,
asegurou que “un software eficiente, capaz e actualizado aforra
moitas horas de traballo”.
En
todo caso, recomendou ás empresas “contar con contratos de
mantemento personalizados, que inclúan un servizo de asistencia
rápida a domicilio e asistencia remota para resolver os posíbeis
problemas coa maior rapidez, así como a recuperación de datos en
caso de borrados accidentais ou danos en discos ríxidos”. O
director de Stin advertiu de que “os datos son unha parte
fundamental e imprescindíbel dunha empresa, pero a maioría delas
non lles dan a importancia que teñen ata que, por un incidente,
estes datos vense comprometidos”. Por iso, incidiu en que “é moi
importante ter un bo sistema de copias de seguridade e que estas
estean supervisadas e periodicamente validadas”.
Ademais
destes equipamentos básicos que son comúns ás empresas en case
calquera área de negocio, Santiago García achegou a emprendedores e
pemes do sector do comercio algunhas solucións tecnolóxicas que
poden contribuír á mellora dos seus resultados. Entre elas,
destacou os sistemas de xestión ERP, os puntos de venda (POS/POS) e
sistemas de pago, o comercio electrónico, as solucións para a
xestión dos inventarios e cadea de subministro, os sistemas de
xestión de clientes (CRM), a análise de datos e a intelixencia
empresarial (BI), a automatización do mercodotecnia, a seguridade
cibernética, e o aproveitamento dos novos recursos da Intelixencia
Artificial e da Realidade Aumentada (AR) e Virtual (VR).
Luis
Blanco, tamén membro do equipo de Stin, foi o encargado de detallar
nesta xornada as posibilidades de cada unha destas ferramentas
tecnolóxicas para o sector do comercio. En primeiro lugar, subliñou
que as ferramentas máis cotiás coas que xa funcionan os
establecementos teñen funcionalidades que moitas veces o usuario
descoñece e que poden ser moi útiles para a xestión, e animou a
aproveitalas. Neste sentido, mencionou especificamente o correo
electrónico, a web, o comercio electrónico ou as redes sociais.
Tamén
explicou as posibilidades dos principais programas para a
dixitalización do comercio. Entre eles, citou en primeiro lugar o
software de xestión empresarial (ERP). Segundo dixo, “a
implantación dun ERP permite un incremento da produtividade,
mellorando desde o control da xestión financeira, ao servizo de
atención ao cliente, a xestión dos recursos humanos, a xestión dos
proxectos, e a cadea de subministración e operacións”.
En
segundo lugar, destacou o BPM (Business Process Management),
que se serve de diferentes métodos cos que descubrir, modelar,
analizar, medir e mellorar os diversos procesos que interveñen nun
negocio concreto. “O BPM optimiza a relación da empresa cos
clientes, simplifica as operacións usando un software adecuado,
reforza a colaboración entre departamentos e permite personalizar os
procesos para adecualos a distintos tipos de público”.
Tamén
explicou o funcionamento dos CRM, o software que permite ás empresas
e autónomos realizar un seguimento das interaccións cos usuarios,
distribuidores e clientes, e que proporciona unha xestión integral
de todos os aspectos relacionados, desde o mercadotecnia á xestión
de vendas.
Entre
as ferramentas que trae a dixitalización e que poden mellorar o
comercio citou ademais a intelixencia de negocio (BI), que se basea
na análise integral dos datos para apoiar a toma de decisións na
empresa, eliminando eivas de eficiencia e permitindo unha adaptación
rápida a cambios no mercado ou a demanda.
Na
xornada interveu tamén Ramón García, especialista de Stin, que
achegou ás empresas os principais protocolos que empregan os
dispositivos e aplicacións tecnolóxicas cos que traballan nos seus
negocios, pensando na súa optimización en clave de ciberseguridade
e óptimo aproveitamento.