As webs de politóns para móbil, caldo de cultivo para fraudes

Non hai un que safe. Os sitios que achegan recursos de lecer para os nosos terminais subministran finalmente máis calotes que recursos de proveito. É máis: todas as webs nas que se ofrecen politóns e fondos de pantalla para móbiles avaliadas no eido da Rede española incumpren as normas europeas que protexen aos usuarios. Segundo informa arestora Elpais.com, o estudo (no que participan todos os países da UE), tampouco bota moi bos resultados sobre o panorama europeo en xeral, onde se localizaron todo tipo de incumprimentos no 80% das webs rexistradas, infraccións case sempre relacionadas cos temas de costume. Falamos, pois, do de sempre: prezos dos que non se informa ou que logo non se corresponden co cobrado, publicidade enganosa e demais.
En total, avaliáronse de arriba a abaixo 558 sitios no eido europeo, dos que (e aquí vén o dato máis preocupante) a metade van encamiñados sobre todo a un público infantil. De todas estas webs, non todas transcenderon aos medios para logo ser localizadas de xeito máis doado polos internautas. Só Suecia, Grecia, Finlandia, Romanía e Letonia deron a coñecer os sitios que, dentro do eido deses países, presentaron irregularidades.
España, no intre en que se redactaba esta nova, aínda non informou sobre as 25 páxinas estudadas, todas elas (pleno entre os plenos) a contrapelo da normativa europea.