As utilidades da mercadotecnia dixital no turismo, ao detalle en Celanova
venres, 28 de setembro do 2018
Este
27 de setembro a Casa dos Poetas de Celanova acolleu a celebración
dunha xornada sobre novas tendencias de mercadotecnia dixital no eido
turístico galego. A
xeira de traballo e debate, organizada polo Grupo Colmeiro, contou
coa colaboración da Deputación de Ourense. Os encargados de
inaugurala foron o vicepresidente da dita entidade provincial,
Rosendo Fernández; o catedrático de Facenda Pública da USC e
coordinador do Grupo Colmeiro, Luis Caramés; e o alcalde de
Celanova, José Luís Ferro. A cita coincidiu no tempo cunha
celebración que lle tocou de preto: o Día Mundial do Turismo.
Na
xornada, o rexedor de Celanova lembrou que as novas tecnoloxías, a
cultura e o turismo están a dar froitos interesantes no municipio,
da man da colaboración do seu equipo coa Deputación. Consecuencia
disto é o
traballo xerado arredor da novela Arnoia, Arnoia de Méndez
Ferrín, que serve de base a un proxecto “para elaborar o
primeiro videoxogo baseado nunha obra literaria galega e ao mesmo
tempo deseñar unha proposta de visita con realidade aumentada polas
terras de Celanova asentado nos principios dese videoxogo”,
explicou.
A
xornada ofreceu aos asistentes solucións para que as empresas sexan
quen de traballar cos datos que proporcionan as ferramentas de
mercadotecina dixital e que, en base a eses datos, poidan elaborar
plans de marketing en liña máis efectivos. Durante a
xornada, os expertos analizaron con casos prácticos as novas
tendencias no devandito eido e mostraron aos asistentes solucións
que lles permitan ás empresas competir mellor e chegar ao consumidor
dunha maneira máis directa.
Luís
Caramés dixo que, tendo en conta que “os consumidores de turismo
actualmente son sobre todo dixitais”, isto guinda novos retos ás
empresas turísticas, polo tanto é “importante coñecer esas
tendencias para adaptarse mellor á oferta, empregar ferramentas de
mercadotecnia dixital e levar a cabo plans de dixitalización da
oferta turística, porque a demanda está a transformar a natureza do
consumidor de turismo”.