As tecnoloxías de código aberto serán analizadas polo miúdo este venres na Cidade da Cultura
martes, 9 de xuño do 2015
Como xa adiantamos dende Código
Cero, este venres 12 de xuño o Edificio CINC da compostelá Cidade
da Cultura acollerá a xornada
(r)evoLuƧión, un encontro de experiencias
inspiradoras para profesionais do eido tecnolóxico e para todas
aquelas persoas interesadas
nas tecnoloxías de código aberto en calquera sector da sociedade.
Informar que a asistencia é de
balde, previa
inscrición, e que o
evento vén da man de AGASOL
(Asociación de Empresas Galegas de Software Libre) en colaboración
coa AMTEGA (Axencia para a Modernización
Tecnolóxica de Galicia). Contarase
coa presenza de relatores como Juan
Freire ou Javier
de la Cueva.
Asemade, os asistentes poderán
compartir experiencias e coñecemento con empresas galegas e estatais
con presenza internacional como: Paco
y Lola, OpenROV,
ICARTO,
Anubia,
IGALIA…
A gran finalidade será “servir
de escaparate de experiencias, novidades e solucións en código
aberto”. Outro gran obxectivo da xornada, informa AGASOL, é buscar
e amosar novas formas de xerar riqueza con sentido ético. Este
cometido de medrar economicamente ao tempo que axuda ao
desenvolvemento da sociedade vai implícito no nome do propio
congreso, un xogo de palabras que “encerra en si mesmo os termos
revolución e ilusión porque, para os que traballan co software
libre, ábrense novas e vantaxosas oportunidades de negocios a partir
da metodoloxía do código aberto”, explica a organización.
A xornada desenvólvese de mañá
e tarde con acceso gratuíto logo de inscrición. Como dixemos,
contará coa presenza de empresas que desenvolven negocios de alta
facturación e con proxección mundial no sector. Estarán tamén os
expertos Javier de la Cueva, especialista no dereito no ámbito
electrónico e de protección de datos; e Juan Freire, consultor en
xestión da innovación, desenvolvemento urbano e cultura dixital.
Nunha primeira charla, Mar Castro (Oficina de Software Libre da Xunta
de Galicia) explicará por que é estratéxico este modelo de negocio
open source;
a continuación presentarase a charla Tecnoloxías
libres e viño: o caso de Adegas Paco & Lola da
man do seu presidente Carlos Carrión.
Javier de la Cueva, pola súa
banda, vai tratar un tema fundamental: o negocio con datos. Así, ao
estaren en pleno proceso de espallamento os sistemas informáticos
baseados na acumulación a grande escala de datos, de la Cueva falará
sobre onde están os límites de todo isto.
O congreso tamén amosará, da
man dos seus responsábeis directos, os detalles de OpenROV, un robot
subacuático económico e de código aberto para exploración e
educación, amais do nome co que se coñece a unha comunidade de
exploradores oceánicos profesionais e afeccionados, e de apaixonados
pola tecnoloxía con sede en California e con delegación en España.
Os impulsores de iCarto, pola súa
banda, explicarán o seu desenvolvemento de sistemas de información
xeográfica mediante SIX, empregados hoxe por exemplo por Enxeñeiros
sen Fronteiras para a localización de auga. Anubia, que ofrece
solucións na nube, falará dos beneficios da implantación dun ERP
de código aberto para negocios a través dun desenvolvemento propio
e adaptado. Igalia compartirá as súas experiencias no
desenvolvemento de proxectos e solucións baseadas no código aberto,
cun modelo tecnolóxico líder no mundo no seu nicho.
Pechará o evento Juan Freire,
falando de futuros, proxectos e novos equipos de profesionais para
que os devanditos proxectos sexan unha realidade.