As tecnoloxías centrarán boa parte do amplo programa de congresos da Coruña en 2018
luns, 14 de maio do 2018
A Coruña quere ser unha cidade referente no
panorama internacional de congresos, poñendo o foco en ámbitos como
as novas tecnoloxías, a saúde ou o turismo. Segundo
vén de informar o Concello, A Coruña será sede nos meses vindeiros
dunha decena de acontecementos das ditas características. O
primeiro estará ligado aos cambios que están a experimentar as
urbes da man de novos eidos de sustentabilidade e novas ferramentas
(Smart Cities), trátase do Simposio
Transforming Cities Enhancing Well Being, que terá lugar entre
os días 16 e 18 e que atraerá a unhas 200 persoas.
Sobre a importancia cualitativa e cuantitativa
destes eventos, o concelleiro Alberto Lema salientou que A Coruña
“está sendo convidada a participar en numerosos eventos, workshops
e encontros profesionais que a consolidan como cidade destino desta
clase de eventos no estranxeiro”. Trátase, como salienta o
concelleiro e responsábel municipal de Turismo, “dun sector
estratéxico, xa que é polo de xeración de actividade turística,
debido ao volume de persoas que atraen e polo perfil que atraen,
vinculado con actividades profesionais que engaden valor a estas
visitas”.
Ao longo deste 2018, espérase que arredor de
3.500 persoas se dean cita na cidade ao abeiro de diversos congresos
profesionais de sectores coma a medicina, as novas tecnoloxías, a
avogacía, a ciencia e o benestar, con citas como A Coruña DNA
Metabarcoding Workshop, no que participarán 100 persoas os días 27
e 28 de xuño; ou o XXVIII Encontro de Didáctica nas Ciencias
Experimentais, no que 200 profesionais estarán na cidade entre o 5 e
o 7 de setembro.