As redes sociais, entre os ingredientes fundamentais das propostas de innovación educativa da UVigo
mércores, 23 de xaneiro do 2013
A Universidade
de Vigo celebrou esta semana unha xuntanza entre docentes para
materializar e facer visíbel e duradeiro o fluxo de experiencias
arredor da innovación educativa. A xornada, que serviu entre o
outras cousas para albiscar os camiños futuros polos que pasará o
ensino superior (máis redes sociais, máis emprego de
interactividade e mesmo de actividades lúdico-dixitais), foi
inaugurada polo reitor Salustiano Mato, que fixo saber que o
obxectivo de eventos como este é “buscar a excelencia en
todos os ámbitos para transferir coñecemento á sociedade e dar
todo aquilo que se espera de nós e, neste caso, falar de innovación
educativa é falar de mellora, de inquietude e de progreso”. A
Xornada de intercambio de experiencias en proxectos de innovación
educativa veu da man da Área de Formación e Innovación
Educativa. Ao seu abeiro presentáronse un total dez proxectos, seis
correspondentes ao ano 2011 e catro ao ano 2012.
Estes proxectos
“demostran o esforzo dun capital humano preocupado por mellorar
e, malia que a redución de axudas económicas deixa na cuneta moitos
traballos máis ca interesantes, sacamos como positivo o interese
xerado por estas iniciativas”, explicou Luís Anido, director
da dita Área. Os traballos, que foron financiados por este
departamento e co apoio do Consello Social da Universidade na súa
última edición, diríxense a posibilitar e promover o intercambio
de experiencias e técnicas empregadas, “en especial nas
relacionadas coas novas metodoloxías didácticas, a chegada de
Internet e as redes sociais, a adaptación ao EEES ou o
a aprendizaxe informal como elemento clave nunha educación global”,
informou Anido. Por certo que entre os ditos proxectos presentados
houbo varios que nos tocan de preto, tematicamente, en Código Cero.
Por exemplo o que veu da man de José Carlos López Ardao, docente na
ETSE Telecomunicación. O seu traballo, informa a Universidade de
Vigo, aséntase na teoría de que a comunicación formal e a figura
do profesorado como elemento clave na aprendizaxe pode ter os días
contados. Para López Ardao o futuro da docencia atópase na
comunicación informal e nas redes sociais porque “coa
implantación do EEES falamos dun novo tipo de alumno, máis
implicado coa súa aprendizaxe, menos dependente e máis
autodidacta, porque camiñamos cara unha educación que supera as
fronteiras das clases e onde a participación virtual tamén ten o
seu lugar”, indica.