As redes sociais como materia prima anticrise serán o eixe dun congreso gratuíto na Coruña
venres, 9 de decembro do 2011
A semana que vén comezará na Coruña con
reflexión arredor do presente e futuro das redes sociais: cómo collelas e,
separando o gran da palla, quedarnos con aquilo que ten máis potencial para
axudarnos a ver a luz ao final do túnel produtivo. Máis polo miúdo, falamos do
Congreso Instrumentos para saír da crise,
un evento que se presenta en dúas metades pero cun nexo común ben definido: hai
recursos na Rede, no coñecemento e na innovación para deixar atrás o parón.
Recursos de abondo, por certo. A primeira das metades do congreso, dirixido a
empresarios, autónomos, emprendedores e estudantes, é un obradoiro práctico sobre
estratexias empresariais, a desenvolver os vindeiros 13 e 15 de decembro
(martes e xoves).
O venres 16 desenvolverase o congreso mesmo de
redes sociais, contando coa participación de expertos de recoñecido prestixio
como José Luis Casal, Juan Merodio, Tristán Elósegui Figueroa e Manuela
Battaglini, e aos que, segundo apunta o equipo da organización, “é moi difícil atopar xuntos nun mesmo foro”.
Ademais, todos eles están considerados gurús
no seu eido, con centos de seareiros nas principais redes sociais. As súas
intervencións e máis os obradoiros terán lugar no Paraninfo da Universidade da
Coruña. Máis información no Centro Municipal de Empresas da Grela, emprazado no
número 62 da rúa Galileo Galilei. A asistencia é de balde e o prazo para
inscribírmonos aínda está aberto, pudendo facerse a través do teléfono 981 189
857 ou a conta de correo info@cmagrela.es.
O evento vén da man do Concello da Coruña, que conta para esta actividade coa
colaboración da Universidade.
Damos conta, un por un, dos relatores do
congreso:
· José
Luis Casal, asesor financeiro coruñés e emprendedor; actualmente lidera
varios proxectos de emprendedores dentro dos ámbitos do social media, mercadotecnia online,
comunicación e emprendemento.
· Juan Merodio, un dos principais
expertos en España en mercadotecnia dixital e redes sociais. En 2006 recibiu o
premio á Mellor Idea do ano 2006 da
Universidade Europea de Madrid.
· Tristán
Elósegui Figueroa, director de mercadotecnia online de Secuoyas (axencia online)
e fundador e socio da escola de internet Kschool.
· Manuela
Battaglini, vicepresidenta da Asociación Española de Responsables de
Comunidades Online (AERCO) e experta en consultora Social Media de
multinacionais.