As principais cidades españolas acolleron o sábado mobilizacións dos profesionais informáticos
martes, 3 de xullo do 2012
A ledicia sen límites dos
seareiros do fútbol esnáfrase de cheo, estes días, coa preocupación de quen
teme polo seu presente e seu futuro laboral. Apenas se entende unha cousa ao
carón da outra. O sábado 30 de xuño, nas vésperas da febre deportista e da
alegría compartida pola riqueza asegurada duns cantos xogadores, rexistráronse
en diversos puntos da xeografía española importantes
mobilizacións dos profesionais da informática solicitando mellores condicións
de traballo. En cidades como Madrid, Barcelona e Zaragoza deixáronse
escoitar proclamas a prol do recoñecemento dunha profesión que, polas razóns
que sexan, aínda está pendente do respecto maioritario das institucións… e
mesmo das propias empresas.
E máis tendo en conta que, como
os profesionais da informática teñen sinalado, o sector das TIC amosan un
potencial de medre e de facturación que xa quixeran outros sectores de meirande
recoñecemento (e apoio orzamentario). Os manifestantes, porén, aproveitaron a
ocasión para denunciar as malas condicións laborais que se teñen rexistrado nas
grandes firmas do sector TIC, “empresas
que presumen da súa excelencia e o seu valor de anticipación e logo amosan
lamentábeis prácticas laborais, éticas e profesionais”. O colectivo fixo
fincapé na necesidade de facer fronte común e de traballar máis conxuntamente a
prol dos dereitos da profesión (cousa na que, por certo, están a traballar
arreo os nosos colexios CPEIG e CPETIG). Un dos obxectivos é acabar xa coa
falsa idea que teñen unha boa parte dos cidadáns acerca das vantaxes actuais de
ser informática ou informático, en termos xerais: nin é certo que todas/os
teñen un bo soldo nin tampouco é verdade que as condicións óptimas de traballo
sexan aplicábeis a todo o conxunto. Máis ben, sinalouse, está a avanzar
contrario: a explotación de sempre.