As nove firmas tecnolóxicas que se veñen de sumar a Porto do Molle amosan o seu traballo
mércores, 1 de abril do 2015
O Centro
de Negocios de Porto do Molle vén de amosar as súas cifras de
actividade do mes de marzo, os seus mellores números dende que
en 2011 comezase a comercialización das parcelas, naves e oficinas
do parque empresarial de Nigrán. Os datos foron dados a coñecer
esta semana, durante a visita ao complexo de Teresa Pedrosa, delegada
do Consorcio Zona Franca de Vigo, co obxecto de coñecer de primeira
man as nove empresas tecnolóxicas que se instalaron no último mes
nas oficinas do edificio. En total, ao longo de 2015 xa se sumaron 15
novas firmas á comunidade de Porto de Molle.
O complexo, como
lembraremos, é sede dos principais programas de promoción
empresarial que está a levar a cabo o Consorcio como son a
aceleradora ViaVigo, o Innovation Vigo Camp, a Factoría de
Innovación e un viveiro o que permite ás empresas beneficiarse de
forma directa de todos os seus servizos. A área industrial do
parque, cualificada de “enclave tecnolóxico”, tamén achega
facilidades aos seus residentes para que poidan acceder ás axudas e
incentivos nacionais correspondentes ás convocatorias do Ministerio
de Industria. Lembrar que conxuntamente co Parque Tecnolóxico de
Vigo, o complexo de Nigrán integrouse na Asociación de Parques
Científicos e Tecnolóxicos de España (APTE).
Entre empresas alugadas e
propietarias de chan na área xa se elevan a 70 as sociedades que
elixiron Nigrán para levar adiante a súa actividade económica e
que entre todas elas xeraron un total de 634 empregos. “Con este
número de novas empresas e traballadores”, sinalou Teresa Pedrosa,
“pódese dicir que Porto do Molle é o parque empresarial que está
a amosar unhas cifras de maior crecemento en comparación con outras
áreas industriais de Galicia”.
Das 9 novas empresas que
visitou a delegada, catro son de recente creación e nacen xa cun
total de 29 novos traballadores, o que fai que no Centro de Negocios
atópense xa 36 empresas que xeran 121 empregos. Teresa Pedrosa
visitou cada unha das oficinas para coñecer de primeira man a súa
actividade. Todas elas abranguen distintos sectores de actividade que
van desde a eficiencia enerxética até a creación dunha plataforma
de distribución de videoxogos en liña mediante unha tarifa plana, a
produción de contido audiovisual, a asesoría de telecomunicacións,
o desenvolvemento de cursos de formación e adestramento en liña, a
asesoría de telecomunicacións ou o desenvolvemento de sistemas de
cultivo hidropónico. Dúas destas novas empresas proveñen da
aceleradora ViaVigo e co aluguer das súas novas oficinas, sinala a
Zona Franca, “deron o paso á súa instalación nun espazo que lles
acolleu desde os seus inicios e que colaborou no crecemento do seu
proxecto”.
As nove firmas instaladas teñen o seu emprazamento no Viveiro de Empresas (Sila Software, Horticultura Hidropónica, Metal Work And Structures e Meseybuco) e máis no Centro de Negocios (Into Galicia Consulting, Renueva Val Miñor, BPO Consultores de Dirección de Empresa Familiar, Isabel Gómez López e Proaytel 2014).