As novas consignas automáticas da Estación de Autobuses da Coruña teñen USB para recargar os nosos dispositivos electrónicos

A Estación de Autobuses da Coruña conta, desde hoxe, cun novo sistema integral de consignas de equipaxe, presentado polo concelleiro de Mobilidade Sostible, Daniel Díaz Grandío, quen valorou positivamente o novo servizo, que ofrece melloras tanto en cuestión de horarios como dos propios atributos do sistema.
Así, as consignas estarán abertas durante os 365 días do ano, durante o horario de apertura da estación, e contarán con adaptadores USB para poder conectar dispositivos electrónicos con seguridade, o que consideran «un novo paso para favorecer a calidade no uso do transporte público colectivo a través dun sistema innovador en Galicia, e que permite que as persoas usuarias poidan dispoñer de espazos adaptados ás necesidades das súas viaxes».
O servizo, que o goberno local renovou por 102.800 euros, estará aberto, de luns a domingo de cinco e media da madrugada a doce da noite e consta dun total de 36 consignas pequenas, dunha dimensión de 45 cm de ancho e 53 de alto, e 12 consignas de maiores dimensións, con 55 cm de ancho e 53 de alto. Todos os módulos teñen unha profundidade de 90 cm e contan con enchufe USB, o que permitirá que as persoas usuarias poidan conectar ou recargar os seus dispositivos durante o tempo que teñan reservado o uso da consigna. Nestas poderanse gardar maletas, bolsas, bolsos, mochilas ou outro tipo de elementos completamente pechados durante un máximo de 48 horas. Unha vez finalice este período, e coa finalidade de permitir o seu uso por parte doutras persoas, os servizos municipais procederán a retirar o contido.
A reserva de consignas realizarase na estación, a través dun módulo de control no que se poderá solicitar tanto a elección do tamaño do como o tempo de reserva (un ou dous días). No caso das pequenas, a taxa diaria será dun máximo de 2 euros, e de 3 euros no caso das grandes. Antes do pagamento, o sistema solicitará un PIN de catro díxitos, que se repetirá para a confirmación da reserva e, despois do pago, emitirá un documento no que conste os datos da reserva (importe, tempo, número de consigna) e un código QR. Durante o período de reserva do módulo, o usuario poderá abrir e pechar tantas veces como precise a consigna ben a través do código QR ou mediante PIN. No caso do extravío do código, o persoal da estación poderá asistir ao usuario, previa verificación da identidade e así como do contido do módulo reservado.