As nosas tres universidades achegan o recoñecemento da experiencia profesional certificada polo CEPRAL
luns, 11 de maio do 2015
O
reitor da Universidade de Santiago de
Compostela, Juan Viaño Rey e o presidente do Colexio Profesional
de Enxeñaría Técnica Informática de Galicia, CPETIG,
Marcos Mata Mansilla veñen de asinar o convenio de colaboración que
permitirá o recoñecemento académico da experiencia profesional na
área da enxeñería técnica informática avalada polo CPETIG a
través do seu servizo CEPRAL. Deste xeito, as tres universidades
galegas e a Universidade Oberta de Cataluña (UOC) outorgan xa este
recoñecemento, grazas aos acordos que asinou o Colexio Profesional
de Enxeñería Técnica en Informática de Galicia con estes catro
centros docentes.
Coa
sinatura destes convenios posibilítase que os profesionais poidan
obter o Recoñecemento Académico da Experiencia Profesional (RAEP)
no ámbito da informática a través dos certificados CEPRAL do
CPETIG nas universidades devanditas.
Segundo
informa a plataforma que preside Marcos Mata, CEPRAL é un servizo de
Certificación da Experiencia Profesional para Recoñecementos
Académicos e Laborais, un servizo que
“xurdiu para posibilitar aos profesionais obter una certificación
da súa experiencia profesional nas actividades propias da enxeñaría
técnica informática”. Ademais do beneficio académico, os
certificados CEPRAL facilitan aos técnicos da enxeñería
informática a acreditación dos seus coñecementos e capacidades
ante as empresas, de cara a afrontar un proceso de selección,
ofrecéndolles un sistema de medición obxectivo.
Segundo
engade Marcos Mata ao fío da metodoloxía a seguir para a obtención
do aval, o Colexio expedirá os
certificados para os alumnos das titulacións que se imparten nas
tres Facultades de Informática da Comunidade Autónoma que así o
soliciten. O número de créditos que se poderán recoñecer por
acreditar experiencia laboral e profesional será o establecido nos
plans de estudo correspondentes. Os certificados que emite o CPETIG a
través do servizo CEPRAL baséanse en perfís profesionais. Nestes
momentos están definidos e habilitados 13 perfís profesionais que van dende administrador
de bases de datos, xestor de proxectos a programador de software para
dispositivos móbiles.