As mulleres representan o 33,4% do tecido laboral do hipersector TIC
luns, 17 de agosto do 2020
O
Observatorio
da Sociedade da Información e a Modernización de Galicia (OSIMGA),
dependente de AMTEGA, publicou estes días unha nova edición do
estudo temático As mulleres e as TIC, no que se fai unha
detallada radiografía da presenza feminina no eido das novas
tecnoloxías poñendo o foco na nosa terra e nos principais avances e
obstáculos na loita contra a fenda dixital de xénero. Na nova
edición do estudo faise saber que o hipersector TIC (sectores
tecnolóxico e de contidos) aglutinaba en 2019 un total de 8.119
mulleres, o 33,4% dos empregados deste escenario dixital.
Dentro
do hipersector, o ámbito dos contidos é o eido no que as mulleres
contan cunha maior representación, acadando o 41,5%, mentres que no
sector TIC a porcentaxe é do 31,1%.
Por
actividades, as relacionadas coas telecomunicacións son as que
contan cunha maior porcentaxe de mulleres, cun 38,9% de traballadoras
femininas; en segundo lugar atoparíanse as empresas dedicadas ás
actividades Informáticas, onde as mulleres representan o 30,4% do
persoal.
En
termos evolutivos, no ano 2019 as afiliacións á Seguridade Social
no hipersector TIC incrementáronse en 1.030 persoas o que supón un
crecemento do 4,4%. Atendendo ao xénero feminino, o crecemento desta
suma de sectores TIC foi do 2,9%, o que se traduce en 228 mulleres
empregadas máis que o ano precedente.
No
estudo faise saber que este incremento de traballadoras resulta
semellante no sector TIC e no sector contidos “se falamos en termos
porcentuais, sendo en ambos casos do 2,9%”. Se consideramos números
absolutos, o sector TIC creou máis postos de traballo cubertos por
mulleres que o sector contidos, 165 e 63 respectivamente.
No
caso do sector TIC, o número de mulleres afiliadas á Seguridade
Social acadou as 5.899 traballadoras, cun incremento dun 2,9%
respecto ao ano 2018. “Non obstante”, explícase no estudo, “a
fenda de xénero continúa a súa escalada debido ao maior crecemento
do emprego masculino (5,3%)”.
Un
ano máis o sector contidos rexistra a menor fenda de xénero do
hipersector TIC, aínda que a balanza continúa a favor do xénero
masculino. A porcentaxe de mulleres neste sector sitúase no 41,5%,
empregando un total de 2.220 mulleres.
Perfil
das mulleres TIC en Galicia
O
70,9% das empresas TIC galegas contan con mulleres entre os seus
traballadores, delas, só no 9,3% máis da metade do persoal son
mulleres.
Respecto
ás funcións desenvolvidas nas empresas TIC galegas, o 16,4% das
mulleres desenvolven tarefas especificamente TIC, fronte ao 49,8% dos
homes. Por outra banda, o 19,4% das empresas TIC galegas contan con
mulleres en postos de dirección
En
canto á formación, mentres que o 22,1% dos traballadores do sector
TIC son homes que contan cunha titulación TIC superior ou media,
unicamente o 8,6% das mulleres atópanse na mesma situación
formativa. No caso dos ciclos formativos superiores TIC, cabe
salientar os 16 puntos porcentuais de fenda de xénero existente, a
maior de todos os niveis formativos.