As mulleres emprendedoras galegas derruban estereotipos no Día das Nenas nas TIC
xoves, 25 de abril do 2019
Hoxe celébrase o Día
das Rapazas nas TIC, que conmemora as importantes contribucións
femininas ao ámbito dixital e que, tamén, achanda o camiño para
convidar ás nenas e ás mozas a percorrer a sempre cambiante (e
interesante) camiño da innovación. A xornada, unha declaración de
loita contra a desigualdade académica e profesional TIC, vén da man
do Centro de Supercomputación de Galicia (CESGA) en colaboración co
Colexio Profesional de
Enxeñaría en Informática de Galicia (CPEIG), a Secretaría
Xeral de Igualdade e GAIN.
As actividades desenvolvéronse (e desenvólvense tamén pola tarde)
na sede do CESGA, cunha manchea de institutos de secundaria
participando in situ ou a través de multi-conferencia (en
streaming).
O
Día das Rapazas nas TIC, para quen non o saiba, é unha
conmemoración que abrangue unha manchea de países e unha manchea de
entidades comprometidas con motivar ás mozas a apostaren polas novas
tecnoloxías como vieiro formativo, investigador e profesional. Para
celebrar a vertente galega da xornada participaron no CESGA catro
mozas galegas representantes do noso tecido empresarial innovador e
tecnolóxica: catro mulleres que investigan, traballan e emprenden
coas TIC, que contaron cadansúa experiencia e responderon ás
preguntas dos centros educativos conectados.
- Mesa inaugural da xornada con Susana López Abella, secretaria de Igualdade, Patricia Argerey, directora de GAIN, Mauro Dabouza, director do CESGA, e María José Malmierca, coordinadora da área de eLearning do CESGA
Previamente,
no acto de inauguración, interviñeron Patricia Argerey, directora
da Axencia Galega de Innovación, e Susana López Abella, secretaria
xeral de Igualdade. Argerey fixo un chamamento a traballar pola
promoción das carreiras tecnolóxicas entre as rapazas, aínda que
recoñeceu que “algo está a cambiar, positivamente, cando as mozas
do noso tempo teñen a posibilidade de saber quen eran Ada Lovelace
ou Ana
María Prieto”, programadoras pioneiras (a primeira no marco
histórico mundial e a segunda no eido galego) amais de referentes da
importante contribución feminina ao ámbito TIC. Abella, pola súa
banda, salientou a importancia do Día das Rapazas nas TIC para
dotarnos de referentes e favorecer o intercambio de experiencias
entre as mulleres emprendedoras e as rapazas, e tamén entre as
mulleres emprendedoras e os rapaces”.
Segundo advertiu, o número
de mulleres que traballan na contorna das novas tecnoloxías non
supera no mundo o 20%. “Está claro que hai un nicho importante de
traballo aquí”, comentou.
As
profesionais e emprendedoras participantes na xornada do CESGA foron
as seguintes:
· Pilar Vila Avendaño. Enxeñeira informática, analista forense e
perito xudicial informático. É directora executiva (CEO) da empresa
Forensic-security.com,
experta en ciberseguridade e integrante do Colexio Oficial de
Enxeñaría Informática de Galicia (CPEIG). Na súa quenda, Pilar
explicoulles ás nenas e nenos en que consiste o seu traballo, un
labor encadrado no ámbito da ciberseguridade e a protección
tecnolóxica, que son, dixo, dous dos eidos profesionais de meirande
proxección na actualidade. “Se vos gusta investigar e tendes
curiosidade e inquietude”, díxolles aos escolares, “entón este
da investigación forense, a investigación e a peritaxe será o voso
traballo ideal”. E engadiu: “Non é un camiño trillado e todos
os días descubriredes cousas novas”.
· Sonia Valladares Rodríguez. Enxeñeira en Telecomunicacións pola
UVigo, investigadora en biotecnoloxía, especialmente na aplicación
de aprendizaxe máquina (Machine Learning), TIC e técnicas de
ludificación na detección precoz da deterioración
cognitiva. Na cita deste 25 de abril, Sonia fixo un percorrido pola
experiencia do seu equipo botando man de diversas tecnoloxías
avanzadas (serious games, gamificación, Intelixencia
Artificial) para detectar doenzas cognitivas e favorecer a
estimulación, a motivación e a calidade de vida das persoas
maiores. “Paréceme importante espertar as vocacións tecnolóxicas
nas nenas e nenos porque o que facemos neste ámbito son cousas
prácticas que melloran o día a día da xente”, dixo.
· Mercedes García Rodríguez. Tradutora, desenvolvedora de software,
co-organizadora de GalsTech e co-impulsora de 1Millionbot,
empresa de desenvolvemento de chatbots de conversa e
comunicacións. É unha dos tres Google Developer Experts de Galicia
e a primeira muller en selo. Mercedes comezou a súa intervención
facendo un percorrido pola súa vocación tecnolóxica, que se
remonta á nenez, pero que colleu un importante impulso coa súa
adicación recente ao desenvolvemento de tecnoloxías de asistencia e
ao servizo das persoas. Segundo apuntou, o seu traballo actual con
chatbots (sistemas de Intelixencia Artificial de voz e de texto)
valeulle para ver que se trata dunha contorna de traballo de gran
potencial, para a que fai (e fará) falta un importante número de
novos profesionais.
· Bertha Caro. Directora da Área de Desenvolvemento Corporativo de
Tecalis (Ames), impulsora de
solucións tan relevantes como Signen
KYC, quiosco dixital con sinatura online que emprega
técnicas de seguridade avanzada mediante cadea de bloques, a
tecnoloxía Blockchain. Caro, que substituíu na mesa á súa
compañeira Leticia Faria de Pazos, comezou a súa intervención
animando ás rapazas a emprender o camiño da innovación
tecnolóxica, un camiño que non ten límites, explicou, e que se
pode iniciar e percorrer dende Galicia e dende lugares como Ames
(sede de Tecalis), concello que destaca polo seu pulo innovador e
que recentemente foi recoñecido co distintivo de Cidade da Ciencia e
da Tecnoloxía, destacou. Neste punto, salientou o talento e o
capital humano das e dos profesionais da nosa terra e lembrou que
nunha empresa como Tecalis hai moitos labores interesantes que
realizar amais de programar. “Todas as mulleres en Tecalis temos
postos de responsabilidade, afrontando proxectos para clientes moi
grandes, aos que axudamos a levar a cabo con éxito a súa
transformación tecnolóxica”.
Axenda de actividades
· 11:00-11:05 Benvida por parte da directora da Axencia Galega de
Innovación e presidenta do Centro de Supercomputación de Galicia
(CESGA), Patricia Argerey Vilar.
· 11:05-11:10 Intervención da secretaria xeral de Igualdade, Susana
López Abella.
· 11:10-11:45 Transmisión por streaming do coloquio cos centros
educativos. Visión e experiencia de catro galegas que traballan,
emprenden e investigan empregando as novas tecnoloxías.
· 11:45 Intervencións de alumn@s dende os centros educativos
participantes conectados.
· 12:15-12:30 Fallo do xurado das propostas gañadoras no concurso
#ApuntasTech?
· 12:30-13:30 Visita didáctica ao corazón do Supercomputador Finis
Terrae e obradoiros tecnolóxicos para as/os participantes na
xornada.
· 17:00-19:00 Visitas didácticas ao corazón do Supercomputador Finis
Terrae, talleres creativos e tecnolóxicos dirixidos principalmente a
mozas e mozos de 5º e 6º de primaria e 1º e 2º da ESO:
programación, Realidade Aumentada e Virtual, Impresión 3D, robótica
maker, etc.