As mulleres e as nenas de Ames rompen estereotipos no Día da Muller e a da Nena na Ciencia
xoves, 11 de febreiro do 2021
O
Concello de Ames quixo celebrar con moita repercusión, este xoves
11, o Día Internacional da Muller e da Nena na Ciencia. E fíxoo
realizando un vídeo protagonizado por veciñas do termo municipal
“co obxectivo de mostrar o labor das mulleres neste campo”. As
Concellerías de Promoción Económica e de Igualdade foron as
responsábeis desta iniciativa que, producida pola empresa Mirabelle
Produccións. Ademais, distribuirase en diferentes formatos e
plataformas.
O
vídeo recolle as contribucións de rapazas e adultas no ámbito STEM
(Ciencias, Tecnoloxías, Enxeñarías e Matemáticas). O audiovisual
recolle o traballo que fan nenas como Laura Montaña e Rosana
Fernández do IES Ames; Clara González e Antía Somoza, xunto coa
súa profesora Mónica Parente, no IES do Milladoiro; Martina Rey
Pérez, Aixa Tarrío Mato, Enma Martinez Carrillo e Adriana Trenco
Varela, alumnas do CEIP de Barouta. Ademais, neste traballo
audiovisual tamén aparecen Sara Zendón e Elena Ventoso, do CEP
Plurilingüe de Ventín; Aldara Domínguez e Candela Penedo do CEIP A
Maía, e Zoe Glasscock e Julia Abelleira do CEIP Agro do Muíño.
En
canto ás mulleres que se adican á ciencia e á innovación en Ames,
o vídeo mostra empresas innovadoras con sede no termo municipal de
Ames. Deste xeito, participan Paula Rey, responsábel de calidade da
empresa Conic Vascular España; Paz Dapena, xefa de proxectos da
empresa Bahía Software; e Berta Caro, directora de corporativo da
empresa Tecalis. Ademais, participan no proxecto Victoria Otero
Espinar, unha investigadora matemática, que dispón dunha
experiencia en investigación de 32 anos e cunha experiencia como
docente de 34 anos, e Magdalena Seco, médico e xefa de servizo do
centro de saúde do Milladoiro.
#NoMoreMatildas
Por
outra banda, cómpre destacar que o Concello de Ames únese ao
movemento #NoMoreMatildas, que nace da Asociación de Mulleres
Investigadoras e Tecnólogas para denunciar as consecuencias do
Efecto Matilda, que non é outro que o de non recoñecer os logros
das mulleres científicas cuxo traballo se atribuía na maioría das
veces aos seus colegas masculinos ou mesmo aos seus maridos, e que
conta co respaldo do Parlamento Europeo.
Dentro
desta campaña realizouse un vídeo onde se reflexiona sobre a
seguinte pregunta (entre outras cuestións): que tería pasado se
Einstein houbese sido muller en lugar de home?
Dende
a Concellería de Igualdade, anímase a todas “as nosas Matildas”,
nenas, mozas, profesionais, mulleres de ciencias a que visualicen o
seu apoio ao movemento subindo fotos ás redes co cancelo
#NonMaisMatildas e etiquetando ao Concello de Ames (@ConcelloAmes en
Twitter; @Concello de Ames en Facebook; e @concellodeames en
Instagram).