As metodoloxías para acelerar a transferencia de coñecemento, ao detalle no novo Foro Ignicia
martes, 13 de xullo do 2021
Este
venres 16 de xullo temos unha cita coa transferencia tecnolóxica e
cos recursos e mecanismos que axilizan o fluxo de coñecemento
innovador e contribucións tecnolóxicas dende a comunidade
investigadora ata as empresas. Estamos
a falar do Foro Ignicia, evento impulsado pola Axencia Galega de
Innovación e a Fundación Barrié, dirixido a mostrar como poñer
en valor os resultados da actividade investigadora, poñendo o foco
nas metodoloxías para transformala en riqueza empresarial.
O
evento, presidido polo conselleiro de Economía, Francisco Conde, e
polo presidente da Fundación Barrié, José María Arias, terá
carácter mixto presencial-virtual, con inscrición aberta para un
número de prazas limitado e para a retransmisión vía streaming.
O
obxectivo do foro é “compartir coñecemento sobre a situación da
transferencia de resultados de investigación en Galicia en relación
co contexto español e europeo, así como abrir un marco de reflexión
e de actuación de cara ao futuro”.
Durante
o evento, presentaranse dous estudos promovidos pola Axencia Galega
de Innovación e a Fundación Barrié. O primeiro deles, A
transferencia de resultados de investigación no Sistema Galego de
I+D. Informe 2011-2018, ofrece unha panorámica detallada de
todos os indicadores relevantes sobre as capacidades dos centros de
coñecemento de Galicia no relativo á posta en valor no mercado das
contribucións que xeran. Pola súa banda, Análise organizativo e
funcional das unidades de transferencia do Sistema Galego de I+D
céntrase na análise da organización das unidades que xestionan a
transferencia nos centros galegos, a súa actividade e o perfil dos
seus profesionais.
Ambos
os dous informes inclúen recomendacións emitidas por un panel de
expertos de recoñecido prestixio para optimizar o rendemento da
transferencia de coñecemento en Galicia e superar os retos de futuro
aos que se enfrontan os centros neste eido.
As
claves do escenario retratado mediante estes dous informes serán o
marco para a reflexión conxunta durante o foro por parte de Fernando
Galindo-Rueda, economista sénior da Dirección de Ciencia,
Tecnoloxía e Innovación da Organización para a Cooperación e o
Desenvolvemento Económicos (OCDE), e Rogelio Conde-Pumpido,
coordinador do estudo A transferencia de resultados de investigación
no Sistema Galego de I+D. Informe 2011-2018.
A
directora da Axencia Galega de Innovación, Patricia Argerey,
presentará as claves do Programa Ignicia-Transferencia de
Coñecemento, unha visión xeral que se completará coa experiencia
dos promotores de dúas spin-off galegas apoiadas polo fondo
de proba de concepto asociado ao programa: ALiCE Biometrics (a
primeira empresa nacida do centro tecnolóxico Gradiant) e Celtarys
(iniciativa de emprendemento xurdida da Universidade de Santiago de
Compostela). Ademais, Antonio Abril, presidente da Conferencia de
Consellos Sociais das Universidades Españolas, analizará a
interacción empresa-universidade ante os novos retos
socioeconómicos.
Finalmente,
Fernando Conesa, xefe do Servizo de Promoción e Apoio á
Investigación, Innovación e Transferencia na Universidad
Politécnica de Valencia, expoñerá a súa visión sobre o
desenvolvemento profesional de xestores/as e investigadores/as no
ámbito da posta en valor do coñecemento.