As galegas Solventis e Qbitia xuntan forzas para liderar o ámbito da consultoría financeira TIC
mércores, 11 de marzo do 2020
- Luis Taboada, responsábel da empresa galega Qbitia, referente no ámbito fintech
As
empresas galegas Solventis
(con sede en Vigo e especializada en servizos de consultoría
financeira e xestión) e Qbitia
(con sede Pontevedra e centrada en solucións avanzadas para fintech)
veñen de pechar un acordo para a integración estratéxica dos
negocios de Solventis e de desenvolvemento de software financeiro de
Qbitia. A finalidade, nas súas palabras, é “consolidar un novo
competidor líder no ámbito da consultoría financeira tecnolóxica”.
Mediante
esta operación, as dúas empresas avanzan un novo e importante paso
no desenvolvemento de novos produtos que, segundo informan,
“respondan as necesidades do sector financeiro, das empresas de
servizos de investimento e das corporacións que demandan estes
servizos”.
No
marco da colaboración, Qbitia achegará a súa capacidade de
innovación e a súa experiencia no desenvolvemento de solucións
tecnolóxicas para a xestión de datos e a conexión con mercados,
mentres que Solventis proporcionará a súa ampla bagaxe en servizos
para a valoración de activos financeiros e a xestión de riscos. “As
sinerxías entre ambas as firmas permitirán ampliar a oferta para os
clientes, multiplicando as perspectivas de crecemento e mellorando o
posicionamento competitivo”, explican, engadindo que en virtude do
acordo, Solventis fíxose co 80% de Qbitia. Luis Taboada, conselleiro
delegado de Qbitia, e o resto do equipo directivo continuarán á
fronte da compañía.
Alberto
Moro, conselleiro delegado de Solventis, declarou respecto desta
operación: “Solventis e Qbitia envían unha mensaxe clara aos seus
clientes e ao mercado ao unir as súas forzas no negocio da
consultoría financeira e tecnolóxica”. Esta mensaxe non é outra
que a súa intención de crear, aproveitando fortalezas e cun
desenvolvemento de negocio sustentábel, “unha empresa líder coas
mellores perspectivas de medre”.
Pola
súa banda, Luis Taboada, conselleiro delegado de Qbitia, sinalou
que, “grazas a este acordo, Qbitia non só seguirá desenvolvendo
as súas liñas estratéxicas de negocio actuais, senón que
integrará as achegadas por Solventis e apostará por outras novas,
xurdidas das sinerxías das capacidades de ambos”.
Por
último, Guillermo Alfaro, director de consultoría de Solventis,
declarou que “os nosos clientes requiren cada vez máis dun servizo
cun alto compoñente tecnolóxico, e o noso obxectivo é ofrecer
servizos que se adapten aos novos retos para a xestión de riscos
achegando experiencia en innovación tecnolóxica, axilidade no
tratamento de datos e transparencia nos procedementos de valoración
e medición de riscos”.