As empresas galegas de contidos dixitais presentarán en Culturgal as súas máis recentes innovacións
martes, 22 de novembro do 2011
- Presentación da edición 2010 de Culturgal
A feira
Culturgal, que se celebra no Pazo da Cultura de Pontevedra a partir do día
2 de decembro, vainos servir para tomarlle o pulso á nosa cultura en relación á
busca de novas canles, e viceversa. Ou sexa, que tamén nos vai valer para saber
o que lle ofrecen as novas canles á promoción da nosa creatividade, da nosa
lingua e diso no que colle todo o que nos fai como somos e que grazas (entre
outras cousas) a certo marketing
dunha coñecida cadea de supermercados estamos todas e todos a lembrar: a
identidade. Leas aparte, en Culturgal, tal e como
avanzamos os días pasados, veremos tecnoloxía galega de primeira liña, “dende innovadoras experiencias na
distribución dixital de produtos culturais ata a aplicación aos distintos eidos
da cultura de fórmulas de financiamento propias dos proxectos tecnolóxicos”,
informan dende a organización do evento.
Por se fora pouco, en Culturgal tamén seremos
testemuñas das moitas vantaxes dun xeito de traballar que grazas en parte ás
redes estamos a pór de novo en valor: o xeito de traballar colectivo. E,
igualmente, o xeito de traballar que promove os beneficios e vantaxes para tódolos
implicados. “Os camiños de ida e volta
que se establecen hoxe en día entre a tecnoloxía e cultura son múltiples e ben
estimulantes”, engádese. O eixe de toda esta actividade e potencialidade
será en parte o espazo garaxe, un dos
moitos escenarios nos que se artella esta edición, achegada como un fogar onde
acontecen moitas cousas interesantes, cada un coa súa natureza e finalidade. O
garaxe, neste punto, é o obradoiro no que se poñen en marcha os nosos cerebros,
o cuarto das pantallas e dos trebellos que, segundo nos contan dende Culturgal,
“forman parte xa da nosa vida e da nosa
maneira de entender a cultura”. Será pois un recuncho para atopar e
difundir “todo o relacionado coa
industria audiovisual, as novas tecnoloxías da información, os novos medios e,
en xeral, calquera proxecto baseado na creación e na distribución de contidos
culturais”.
Para ir facéndonos unha idea e un programa
persoal de cousas ás que cómpre ir coñecendo, dicir que no espazo garaxe a
empresa Wireless Galicia presentará iBeaken (unha innovadora ferramenta de
difusión de contidos multimedia a través de dispositivos móbiles con moito
potencial para museos, actividades turísticas ou centros de interpretación), os
membros de Contact farán o propio con Orama (aplicación para dispositivos
móbiles que se basea no xeoposicionamento e en todas as posibilidades que
ofrece a realidade aumentada) e Own The Way achegará o seu portal participativo
de creación e divulgación de audioguías turísticas.
Finalmente o Centro de Innovación e Servizos
do Deseño e a Tecnoloxía de Ferrol (CIS) axudaranos a entender que aplicación
ten a realidade virtual para as empresas culturais. Ademais, infórmase dende
Culturgal, durante os tres días da feira, EGANET e as súas empresas asociadas
amosarán a súa cara máis “sociable,
explicando de xeito ameno e áxil as diferenzas entre as TIC e as TI e as súas
aplicacións ás necesidades deste mundo”. A cita é a partir das 19h, nas cervexas tecnolóxicas, onde Wireless,
Galebook, Enxenio e Ceo Aberto explicarán os seus proxectos a quen se achegue
ata o seu stand. Tamén haberá
sorpresas robóticas e celebrarase o segundo campionato aerodinámico de EGANET.
En breve daremos máis datos sobre a feira e todo o que poderemos atopar noutro
espazo do salón que deberemos ter moi en conta: o Foro Culturgal.