As empresas galegas afiánzase á cabeza do Estado en uso de software libre
luns, 7 de abril do 2014
Onte publicaba o
Observatorio da Sociedade da Información e a Modernización de
Galicia (OSIMGA) -adscrito á Axencia para a Modernización
Tecnolóxica de Galicia (AMTEGA)- as conclusións tiradas do seu
estudo O
uso de Software libre nas empresas e no sector TIC de Galicia. Ano
2013. Entre outros datos deducidos desta análise salientar
que tres de cada catro empresas de Galicia (con 10 ou máis
asalariados) emprega programas abertos, 3,4 puntos por riba da media
estatal, o que sitúa a Galicia no primeiro posto das Comunidades
Autónomas nesta listaxe. No caso das microempresas, a porcentaxe
sitúase nun 44,3%.
En canto ao sector TIC
galego, o 84,2% das empresas informáticas empregan software libre,
experimentando un crecemento de 2,2 puntos porcentuais respecto ao
ano anterior. As microempresas informáticas galegas rexistran
porcentaxes algo superiores ás empresas de maior tamaño no uso do
software libre (85,2% no estrato de 3 a 9 empregados e 82,1% nas
empresas de 10 e máis asalariados). Asemade, tamén se di neste
estudo que as empresas informáticas empregan software libre de xeito
máis xeneralizado, pasando de usalo en menos da metade dos seus
equipos ao usalo no 73,6% dos computadores de usuario e no 65,6% dos
servidores.
Os programas libres con
maior presenza nas empresas galegas de máis de 10 empregados son os
navegadores de internet (71,4%) e as aplicacións ofimáticas
(54,3%). O 34,6% empregan tamén sistemas operativos libres. Estes
datos sitúan a Galicia nos primeiros postos da listaxe entre as
comunidades autónomas, sendo a 3ª no uso de navegadores libres, a
5ª nas suites ofimáticas libres e a 6ª no uso de sistemas
operativos libres.
É preciso subliñar
que as empresas informáticas galegas tamén teñen o seu espazo na
venda de software libre, sendo máis da metade (50,9%) as que ofertan
este tipo de produtos aos seus clientes. O principal tipo de solución
ofertada en software libre é o “Sistema de xestión de bases de
datos” (29,6%) mentres que no caso do software privativo é o
“Software de seguridade” (55,3%).
Non podemos esquecer
que a porcentaxe de empresas informáticas galegas que venden
aplicacións para o e-Commerce é superior en software libre (18,3%)
que en privativo (17,8%).
As empresas
informáticas galegas ven no software libre un posíbel nicho de
mercado e máis da metade das empresas deste eido (51,4%) consideran
que a tendencia do mercado dos software libre será expansiva.
Todos os informes e
documentos do OSIMGA distribúense de xeito libre na Rede baixo
licenza Creative commons e están dispoñíbeis na web do
Observatorio.