As claves para sermos innovadores, eixe temático dun curso da USC

Fálase moito de innovación, pero se cadra non se falta tanto como se debera das cousas que fan posible esa innovación. É dicir: en contra do que é lóxico e natural, comezamos o conto polo final en troques de polo comezo. Para ir poñéndolle solución a isto, a iniciativa Uniemprende da Universidade de Santiago de Compostela (dirixida a facilitar a transformación de proxectos en realidades de mercado) convoca o curso en liña Que necesito para que mi empresa sea innovadora? A actividade, que por desgraza só se presenta en castelán, vai dirixida a informar dos elementos clave para a posta en marcha dunha empresa innovadora ou para modernizar unha xa existente.
Xa nun eido máis concreto, a actividade parte do contexto actual de crise para afianzarse no extremo oposto, nas vantaxes do coñecemento e a creatividade aplicada ao empresarial, achegando habilidades e divulgando apoios no camiño dun emprendemento óptimo.
O curso, que se celebra do 8 ao 22 de xuño e que consta de 40 horas lectivas, está dirixido a emprendedoras e emprendedores de proxectos tecnolóxicos de carácter innovador, persoal que traballe dentro do eido do asesoramento á creación de empresas, profesionais de empresa, así como a todas aquelas persoas que vexan no mesmo unha ferramenta de axuda para desenvolverse no seo do seu negocio. Para máis información sobre o curso, que é de balde e ten prazas limitadas, Uniemprende explica os obxectivos e o programa detallado neste pdf.